نئچه گون اؤنجه ایران آذربایجانیندا تبریز شهرینده اختر یایین‌ائوی آراجیلیغی‌یلا «هیم‌جیم» آدیندا حئکایه توپلوسو باسیلدی. کیتابین یازاریندان داها اؤنجه «منیم آدیم لاله‌دیر»، «جوجه‌لر»، «چادرالی لئیلا» اوشاق شعر کیتابی کیمی همن ناشیرله، بیر ده «شاینا» آدیندا یئنی‌یئتمه‌لر اوچون دوز‌یازی پووئستی یئنی‌یئتمه اوخوجولارین اوخوسونا وئریلیب یاییملانمیشدیر. قئید ائتمک لازیم‌دیر کی، «شهرام گلکار»ین اؤز یازیلاریندان اوّل هم آذربایجان هم تورکیه یازیچیلاریندان شاعرلریندن چوخلو کیتابلار آنتولوگی‌لر کؤچوروب چئویرمیشلییی اولوبدور. کیتابین اوز قابیغینی موغانین داها اؤنجه‌دن سوررئال یاپیتلار اوزه‌ره نئچه کیتابی باسیلمیش ده‌یرلی تاساریمچی «رحیم کوهی» ایشله‌میش‌دیر.
کیتاب ۴۸ حئکایه ۱۳۲ صحیفه ۱۴.۵×۲۲ سانت اؤلچوسوندن اولوشور. بو، دانیشدیغیمیز یازارین اوخویا‌بیله‌جک بوتون قوشاقلار اوچون سرگیله‌دییی ایلک یاپیتی اولور.
بو سئویندیریجی اولایی ادبیاتین دیرچه‌لیشی آدینا قوتلو ساییریق. اومود ائدیریک کی، هم ایندی هم گله‌جکده اورتایا چیخان یازیلاریمیز اوچون هم ده اویقارلیق نامینا یارارلی اولا.
کیتابین آرخا قابیغی‌نین تاساری‌سی‌نین ائستئتیکاسینا قاتقی‌دا بولونان، هم داها اوخومامیش اوخوجولارا حئکایه‌لرین توموندن اؤزت گئچمک اوچون داها اؤنجه‌دن حئکایه‌لرین دؤرد-بئشینی اوخوموش آذربایجانین اونلو یازاری «راسیم قاراجا»دان قیساجا ده‌یرلندیمه بابیندا یازیلان سؤزلر بؤیله‌جه گئدیر:
«سالام شهرام بی؛ چوخ ساغولون، حئکایه‌لری گؤندردیز، اوخودوم، چوخ خوشوما گلدی؛ لیتئرآز. کوم‌دا یایینلادیم… چوخ ساغولون، سیزین‌له تانیش اولدوم. حئکایه‌لریزی اوخودوم؛ گؤزل کیچیک حئکایه‌لردی. من اؤزوم ده بئله کیچیک حئکایه‌لر یازیرام، مینیاتور حئکایه‌لر؛ بونون آدینا شورت استوری دئییرلر؛ قیسا… ان قیسا حئکایه، سون کیتابیم‌دا بو طرزده، سیزین یازدیغینیز طرزده یازماغی دئنه‌دیم. بو طرزده یازماق چوخ چتین‌دی، آمما سیز باشارمیش‌سینیز؛ دیلی‌نیز ده چوخ گؤزل‌دی؛ یعنی بیزه گؤره غریبه بیر دیل‌دی. یعنی بیزیم ادبیات دیلی‌میزده، سیزین یازدیغینیز بو اوسلوب، دئمک اولار کی یوخدور. فرقلی بیر دیلی بوردا سرگیله‌می‌سیز؛ اوستا بیر یازار اولدوغونوز دا گؤرونور. ان‌شااللـه یئنه ارتباط‌دا اولاریق. یئنه حئکایه‌لری‌نیز اولدوقجا منه گؤنده‌رین. تشکّور ائدیرم. ساغولون. ایی گون‌لر…»
