چئویرن: ایشیق
ترجمه: ایشیق
ایشیق

kovsen
“کؤوشن”‌ین مقدمه‌سی
حبیب ساهر

(بو یازی، اوستاد حبیب ساهرین کؤوشن آدلی شعر مجموعه‌سینین مقدمه‌سی‌دیر)

 … اکین‌لر گؤورنده، آغاجلار گولله‌ننده مرموز دونیادان ایشیقلی عالمه گلدیم. بئشیک منی سیخارکن، ائو منی بوغارکن، آنام منه لای لای دئدی…

آنامین سوتی منه جان وئردی. او منی اؤپرکن دوداقلاریم، اوزوم، گؤزوم آل رنگه بویاندی! ایچیم یاندی! بئله‌لیکله بختیم، طالعیم اویاندی. بوی آتدیم… بئش یاشا چاتدیم. کندیمیزده فیرطینا قوپدو! آتام بیر گئجه، پاییز گئجه‌سی قوناق گئتدی، بیر داها ائوه گئری دؤنمه‌دی… یئتیم قالدیق. سینیق لامپایا قییدیق، آلتیمیزا کؤهنه کئچه سالدیق، آجلیق گؤردوک؛ کورلوق چکدیک… هی باتمیش دونیا! نه گونلر گؤردوک! بؤیودوک… مکتب‌لرده، مدرسه‌لرده موهومات‌لا باشیمیزی توولادیلار، بیزی آزغین سالدیلار. دئدیلر کی اولدوزو کور اولانین  بختی‌ده قارا اولور، قول اولور…

داخمادا یاتسین گره‌ک؛ دونیایی آتسین گره‌ک! بؤیوکلره حؤرمت، اربابلارا خدمت ائدیب، بیر پارچا چؤرکله، بیر کوزه سو ایله کئچینسین، آللاها شکر ائله‌سین…

 عربیات جانیمی سیقدی، ادبیات‌ایسه اومید ائویمی ییخدی، دونیا بئش گوندور دئدی، گؤزللرده وفا یوخ، حیاندا جفا چوخ، اؤزونه گل! دیرده اوتور، سو باشیندا چادیر قوور، شراب ایچ، افیون چک، حیاتین اوزونه آت توپورجک!

درویشلیک‌له، قلندرلیک‌له آلیشامادیم… ایکی یول آراسیندا قالدیم: بیر طرفده تصووفون رمزلی، قارانلیق دونیاسی، بیر طرفده ایسه گونشله پارلایان رئال عالم گؤردوم، آتیمی ایشیقا سوردوم! ماهنی سؤیله‌دیم، شعر یازدیم، یازدیم، پوزدوم. یادلار منی داندیلار، ائللر منی آندیلار، آلقیشلادیلار…

من، یولومو تاپمیشام، ایشیق عالم اورادادیر، شن گونلر، آزاد ائللر اورادادیر. دونیا بئله اولمالی…

چاپ

یک پاسخ

  1. سلام. بؤیوک شاعیریمیزین اؤلومونو دوکتور صدیق منه چاتیردی ، اوگئجه سحره دک یوخوم گلمه دی و یاتمادیم .دؤنه دؤنه آغلادیم و ساهره بیر شعر یازدیم . همن شعر ساهیر اوچون یازیلان شعرلر آراسیندا ، وارلیق مجلله سینده چاپ اولدو.بیز اونو تئز -تئز گؤرور و معنوی دونیاسندان فایدالانیردیق او رئال حیاتین وورغونو ایدی. وفاتیندان بیر آی قاباق دوستلارلا گوروشونه گئتمیشدیک .بیزه بیر شعر اوخودو خرافه چیلیگین علئیهینه ایدی . اونون انیلمزلیگی و آیدین دونیا گؤروشونه باش اییرم .عزیز و اونودولماز خاطیره سینه عشق اولسون / تهران – ائل اوغلو

دیدگاهتان را بنویسید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *

“کؤوشن”‌ین مقدمه‌سی / حبیب ساهر

ایشیق
www.ishiq.net

آذربایجان ادبیات و اینجه‌صنعت سایتی

“کؤوشن”‌ین مقدمه‌سی / حبیب ساهر

ایشیق
www.ishiq.net

آذربایجان ادبیات و اینجه‌صنعت سایتی

“کؤوشن”‌ین مقدمه‌سی / حبیب ساهر

ایشیق
www.ishiq.net

آذربایجان ادبیات و اینجه‌صنعت سایتی