چئویرن: نیگار نوروزی
ترجمه: نیگار نوروزی
نیگار نوروزی
00:00
00:00

«داش»، تورک دیلینده «یول» سؤزونه قووشاندا، «یولداش» کیمی ان گؤزل سؤز ترکیبی یارادیر. او، سنین گلدییین، اولدوغون و گئده‌جه‌یین یولا گؤره سنی باشقاسی ایله اونسیتده قرار وئریر، دوشونجه‌دن و اوره‌کدن بیر یاخینلیق یارادیر.
سن حیات یوللارینی تک باشینا سئیر ائدرکن، باشقا اینسانلار دا بو یولو سنله برابر تک باشینا سئیر ائدیرلر. بو یولدا قارینداشین اولور؛ آداشین اولور؛ سیرداشین اولور؛ فیکیرداشین اولور؛ بیر ده کی درین معنالار داشییان «یولداش»ین اولور. بو یولداشلیغی بعضا ده یوللار یارادیرلار: حیات مجادله‌سینده چیین به چیین ساواش آپاران «یولداش»لار؛ آجیلی شیرینلی گونلرده بیر بیرینه آرخالانان «یولداش»لار و بیر «یول» اوغروندا «اورکلرینده درین بیر سئوگی» داشییان «یولداش»لار. بیر «یولداش»لار کی اونلارین یوخلوغو، سنین داوام ائتدییین یولدا سنه درین چوخورلار قازدیراجاقدیر. چوخورلار سنینله آددیملایاجاق و چوخ زامانلار گؤز قاباغیندان اوزاغا گئتمییه‌جک‌. چوخورلارین سویوقلوغو و قارانلیغی سنی دوشوندوره‌جک، حسرت دادینی سنه حیس ائتدیره‌جک؛ بیرده کی، یئرینی چوخورلارا وئرن هوندورلویون بوش یئری، «هژار» درینلییینده انساندان محروم ائده‌جک سنی و یولون داوامیندا تکجه درین چوخورلار قالاجاق، بیرده تک‌لیک.
ایلک دفعه یولداشلیق خاطیری اوچون بیر داغ زیروه‌سینی هدف توتمالی و قورخو- سئوینج و هیجان قاریشیقلی بیر خاطیره آخشامینی یاشامالیسان؛ تریبونلاردان، جنابلاردان و چلچراقلی سالونلاردان اوزاق. الین یئردن اوزولوب و «قانلی چکمه‌لر یول آچا بیلمز» بیر یوکسکلیکده آددیم آتمالی‌سان.
یول‌لار ساعاتلارجا سنی یئریدیر؛ بؤیوک آغیرلیغی سندن آلیر؛ قوش کیمی ائدیر و «آخشاملار قوشور هر قوش مین دستان». هر سؤز «یولداش» اوچون حصر اولور؛ هر دویغولو آن یولداشلیق ماهنیلارینی یادا سالیر و «اولدوزلار یئره باخان گونه دک» یولداشلیق خاطیرلانیر.
حیاتیندا ایلک زیروه یولونا آیاق قویوبسان‌سا، قورخودان – یورغونلوقدان و «بیرلیکده یانان وفالی یولداش»سیزلیقدان قاچماق اوچون یئنه ده ماهنیلارا سیغینیرسان. ماهنیلار دا «سؤیله‌ییر ایگیتلر چکن غم‌لری».
«بو داغ‌لار اوجا باش؛ اوجا باش داغ‌لاردا» اینام‌لار و دوشونجه‌لر ماهنیلاردا هارایلانیر. آیری-آیری دیلده دانیشان، آیری-آیری یوللاردان گلن، آیری-آیری داغلاردان ائنن و آیری-آیری دویغولار داشییان یولداشلارین آراسیندا قارداشلیق و باریشیق ماهنیسی سؤیله‌نیلیر.
زیروه یولو بیزی یاشدان اؤتور، دیل‌دن اؤتور، سؤیله‌دیییمیز ماهنیلاردان اؤتور بیر- بیریمیزدن آییرمادی. او یول بیزی یولا وئردی و زیروه‌یه چاتدیردی. او یول آرامیزدا بیر ماهنی اولدو، یولداشلیق ماهنیسی، ساواش مارشی و چتین یول‌لارین گولوش نغمه‌سی اولدو؛ آرامیزدا سسلندی؛ بیزی بیرلشدیردی؛ یولا گتیردی و «هامییا بیر دوست، بیزلره قارداش» اولدو.
سن حیات یوللارینی تک باشینا سئیر ائدرکن، باشقا اینسانلار دا بو یولو سنله برابر تک باشینا سئیر ائدرلر. آمما، آرخاسیندا دورا بیلسن، زیروه‌یه ده چکه بیلرسن، هر شئی دن اؤنجه یول بیر «یولداش» اولا بیلرسن…
سون

دقت: « » آراسیندا گلن سؤزلر و مصرع‌لر آذربایجانین انقلابچی شاعری «علیرضا نابدل اوختای»ین «یولداش کوردوستان» شعریندن آلینیبدیر.

چاپ

یک پاسخ

دیدگاهتان را بنویسید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *

یول بیر «یولداش»

نیگار نوروزی
www.ishiq.net

آذربایجان ادبیات و اینجه‌صنعت سایتی

یول بیر «یولداش»

نیگار نوروزی
www.ishiq.net

آذربایجان ادبیات و اینجه‌صنعت سایتی

یول بیر «یولداش»

نیگار نوروزی
www.ishiq.net

آذربایجان ادبیات و اینجه‌صنعت سایتی