رقیه خانیم کبیری‌نین چوخ گؤزله‌دییم دوشرگه رومانی بیر نئچه گون قاباق الیمه چاتدی و ایلک فورصتده اوخوماغا باشلادیم. واجیب ایشلر اوچون کتابی یئره قویماسایدیم، بلکه‌ده گؤزومو قیرپمادان بیر گونده اوخویوب بیتیریدیم. آخی، رومان «منی یئره قویما آماندی»- دئییب باغیریر. رقیه خانیم اوستالیقلا اوخوجونو اؤز آرخاسیجا یورولمادان چکیب آپاریر.
رومانین گئدیشاتیندا شیرینین آدینی چوخ گئج بیلسم بئله، نم- ندن قریبه بیر حیس اونون آدی شیرین اولدوغونو تخمین ائدیردیم.
تبریزده بویا باشا چاتان بیر شهید قیزی، باغلی اولدوغو قوندارما ایفتخارلی آد و او آدلا یارانان یاساقلارلا باریشمایان و مباریزه ائده‌ن بیر شخصیت، نهایت، وطندن آلمانا قاچماق و اوردا سیغینماق قرارینا گلیر.
بو شیرین و آخیجی رومان، بعضی گرچکلره دایاراناق، هر پاراگرافدان بیر، فلش‌بک‌له اوخوجونو هیجانلاندیرماق و داد آلماغی باشاریر.
رقیه خانیم هر روماندا گؤرستدییی کیمی، بوردا دا تابولاری، یاسالاری سیندیریر، قادینین نرمال جینسی غریزه‌لرین اورت باسیر ائتمیر، هر بیر اولایدا اونو گیزلین و یا آشکار شکلده، سرگیله‌ییر.
شیرین‌ین اؤز اری قوم تلیسی کیمی اوستونه دوشوب اونا تجاوز ائله‌ینده بئله، لذت حیسیی اولدوغونو گؤروروک.
هاوا لیمانیندا گؤردویو او قارا دری کیشی، اونا- یقین گیزلیجه باخدیغی- بیر فیلمی خاطیرلادیر و هیجانلانیر.
عزیز یازار، آنالیق دویغولارینی شیرینین دیلیندن و اونون رفتارلاریندا چوخ گؤزه‌ل آنلادیر. آلمان دوشرگه‌سین‌ده بیر تورکیه‌لی قادین تجاوزدان حامیله قالدیغینی بئله، قیسقانیر.
هر بیر سطیرده قادین و اونون روحیاتیندان یازیر، شیرینین آناسی بو روماندا گوبود و روحسال خسته کیمی گؤرسدیلیر سه‌ده، آرخا پیلاندا ایران عراق ساواشی‌نین ایلک شهیدلری قادیندیر دئیه، یازیلمامیش بیر ایفاده لری آنلاماق اولور.
شیرین قاچقینلارین دورومونو و چوخ چتینلیکلرله ال به یاخا اولدوقلارینی آنلاداندا فلش‌بک‌له تبریزده‌کی دوروملا قیاس ائدیر و دوز یولدا اولدوغونا اینانیر.
تبریز حسرتی و نوستالیژیسی یاشلی کیشی دیلینجه و اونون تربیز خاطیره‌لرینده اوخوجویا چاتدیریر.
خانیم کبیری‌نین رومانلاریلا تبریزی قاریش با قاریش گزمک اولور. سانکی او اؤزو سحردن آخشاما تبریزی آددیملاییب و هر بیر محله سینده ایز بوراخیب.
دوشرگه رومانین اوخوماغی هر بیر ادبیاتچی اؤزللیکله قادینلارا توصیه ائلیرم.
قادینلارین فخری، رقیه خانیم کبیری‌یه بوللو اوغورلار و یئنی- یئنی اثرلر یاراتماغی دیلیرم.