غربی آذربایجانین، خصوصیله ده اورمو شهری‌نین آدلیم ضیالی عائله‌لریندن، اوستاد عباس بزرگ‌امین(۱۳۱۵-۱۱خرداد ۱۳۷۷) عائله‌سی‌دیر. آلتمیشینجی ایللرده اونونلا تانیش اولوب و دفعه‌لرله ادبی مجلیسلرده شیرین صؤحبتلرینین، کلاسیک عاشیق صنعتیمیزدن، ائله‌جه‌ده آذربایجان شاعرلریندن دانیشدیغی داستانلارین و دکلمه ائتدیگی شعرلرین شاهیدی اولموشام. چوخ گوجلو بیر یادداشتا مالک اولان اوستاد بزرگ امینی آذربایجانین سینه‌دفتر شاعرلریندن، شفاهی خالق ادبیاتی و خصوصیله ده عاشیق صنعتیمیزین ان صمیمی و جدی تبلیغچیلریندن حساب ائتمک اولار. اوستادین عائله عضولرینین هامیسی آذربایجانیمیزین مدنیتی و ادبیاتی انکشافیندا زحمتلره قاتلاشان شخصیتلر اولوبدولار. عائله‌نین بؤیوک اوغلو دوقتور اصغر بزرگ‌امین(شاعر)، دیگر ائولادلاری دوقتور اکبر بزرگ‌آمین – جنون- (شاعر و عاشیق)، دوقتور جواد بزرگ‌امین(ساز ایفاچیسی)، مسعود بزرگ‌امین(آغاج اویماجیلیغی صنعتی اوستاسی) و یگانه قیزی ایسه ساز ایفاچیسی‌دیرلار. اوستادین قارداشی جعفر بزرگ امین ایسه ادبی جمعیتیمیزده تانینان شاعر و تنقیدچی اولموشدور.
تاسفله اوستاد عباس بزرگ امین‌ین شعرلری و یارادیجیلیغی‌نین دیگر نمونه‌لرینین اکثریتی یاییلماییبدیر. اونون سعدی‌دن ائتدیگی ترجمه‌لردن علاوه، یالنیز «عاشیق علعسگر؛گؤزللیک نغمه‌کاری» آدلی ایکی جیلدلیک کؤچورمه کیتابی یاییلیبدیر. گون او گون اولسون کی اوستادین اثرلرینین خصوصیله ده شعرلرینین یاییلماسینین شاهیدی اولاق.
اوستاد عباس بزرگ امین آرامیزدا اولسایدی ایندی ۸۵ یاشینی یاشاییردی. اونودولماسین دئیه، خسته‌لیکده یازدیغی سون شعرینی اوخوماقلا، شرفلی خاطیره‌سینی عزیزله‌ییریک.
باشی قارلی بیر داغام من
چیسکین دومان منه نئیلر!
بار بهرلی بیر باغام من
شاختا، بوران منه نئیلر!
باغبانام عشقین باغیندا
کؤنول محبت طاغیندا
جان، نازلی یار آیاغیندا-
اولسا قوربان منه نئیلر!
بیر باغبانام یازیم سوسماز
بیر اوزانام سازیم سوسماز
«بزرگ‌امین» سؤزوم سوسماز
ده‌لی دؤوران منه نئیلر!
فروردین- ۱۳۷۷
