اوجا داغلارین تانیشی
سعید موغانلی
..:ای فضولی هر عمل قیلسان خطادیر غیرِ عشق:..
منه ائله گلیرکی، هله‌کی هله‌دی، بیز شاعیرلرین پیری، مرادی، للـه‌سی مولانا فضولی اولمالیدی! نییه‌کی دوستا عشق و سئوگی، یادا سئوگی، داغا عشق، چؤللوکلره عشق، هرنه‌یه-هرنه‌یه سئوگی و محبت گؤزویله باخیر. هم ده هیجر و سئوگی عذابینا دا عشق ایله باخیر.
غم هجردیر کی آرتار اثرییله، عشق ذوقو
غلط ائیله‌میش فضولی کی وصاله طالب اولموش.
فضولی دده‌نین گوجونو و سئیوری قلمی‌نین و یانیق گؤنلونون صادقلییینی و شاعیرلییینی محض «لیلی مجنون» منظومه‌سیندن باشا دوشمک اولار.
او هاردا باسدیریلماسینی و نییه اوردا باسدیریلماسینی دا سئوگی ایله آچیقلاییر و اونون دلیلینی ده محض عشق بیان ائدیر. وصیت ائدیر کی منی امام حسین (ع) مبارک حرمینین ایچینده باسدیرمایین! قیزمار گونشین آلتیندا و حرمدن ائشیگه مولانین آیاق طرفلرینده باسدیرین، قویون بیر سایه دوشسون اول ماه قامتدن. قویون آغانین حرمینین سایه‌سی دوشسون مزاریمین اوستونه و هر گون زائرلرینین آیاق توزو دَیسین قبریمه…
حکیم فضولیدن باشلادیم سؤزومو، مولا گؤره‌لیم نئیلر! نئیلرسه گؤزل ائیلر…
گونوموزه و گون شعریمیزه گلینجه، منجه معاصر شعریمیزین ان گوجلو چاغلارینی تجربه ائتمکده‌ییک و نه خوشبخت شاعیرلریک بیز…
بو معاصر دووروموزون ده اؤزونه مخصوص شاعیری، حیاتی و پوئزییاسی وار.
قارداغ همیشه شعر، شور و شعور قایناغی اولان آذربایجان بؤلگه‌لریندن بیری اولوب. توت شیخ شهابدان، نباتی‌دن تا عاشیق چنگیزه قدر… توت ستارخاندان عاشیق محبوبا قدر، توت ستار گول‌محمدی‌دن علی جوادپورا و تانیش افسر جنابلارینا قدر… هامیسیندا عشق، صداقت، جسارت، محبت و انسان‌سئورلیک، وطن سئورلیک دالغالانیر. هامیسیندا انسان اوغلونون خوشبخت یاشاماسینا، طبیعتی سئویب ساخلاماسینا، یارانیشا، یارادیلیشا، یارانمیشا حؤرمت بسله‌مه‌سینه اینام و پیام وار.
من ادبی حیاتیمدا شاعیر تانیشی سئوگی قوللوقچوسو، سئوگی مریدی و اینام دؤیوشچوسو کیمی گؤردوم. بوتون شعرلرینده صادقلیک و خلقیلیک اؤزونو سرگیله‌ییر. مصرعلرینده انسانا، طبیعته، دوستا محبت دالغالانیر.
شاعیر افسر تانیش، اؤز اوچ کیتابلیق شعرلرییله و بیر عؤمورلوک یاشامییلا حیاتدا انسانلیق و عشق دئیه بیر تامغا ووردو و هله عؤمور بویو ووراجاق. اونا اوزون عؤمور، خوشبخت یاشاییش و سئوگی دولو مصرع‌لر آرزولاییرام.
قوی شاعیر دوستوما یازدیغیم بو قیسا یازی‌نین سونو دا فضولی علیه‌الرحمه‌دن یاد اولسون:
قد انار العشق للعشاق منهاج الهدی
سالک راه حقیقت عشقه ائیلر اقتدا
عشق‌دیر اول نشئه‌ی کامل کیم اونداندیر مدام
می‌ده تنویر حرارت، نی‌ده تأثیر صدا…
تهران-یای-۱۳۹۶
قید: یازی، تانیش افسرین تزه چاپ اولموش «آچار» شعر کیتابی‌نین مقدمه‌سیندندیر. شاعیر دوستوموزون ابدی‌لیک سوسماسیندان بیر هفته قاباق «دده قوربانی اوجاغی» و «یاشماق» طرفیندن نشر اولان «آچار» شعر کیتابینا گیریش اوچون سایین یازارلار «علی تقی‌زاده لاریجان» و «آزرائللی» جنابلاری‌نین یازی‌لارییلا بیرگه یازیلیب و چاپ اولموشدو.(سعید موغانلی)
