اوخوجو مکتوبو(اوستاد علی میثمی تبریزی حقینده)
ائل اوغلو (صدیار وظیفه)
سلام. اونودولماز دوستوم اوستاد «علی میثمی تبریزی»نین وفاتینی قاراداغدا سایتینیزدان اؤیرندیم. او حقیقتا تایسیز اینسانلاردان بیری ایدی. تپه‌دن دیرناغادک شاعیر ایدی. آیدین دوشونجه‌لی و جوشغون اورکلی بیر شاعیر ایدی. اوستادین آغیر ایتگیسینی بوتون آذربایجان سئورلره، اونون محترم عائله عضولرینه تسلیت دئییرم. ایستردیم ۹۳ ایل اؤنجه تبریزین دومانلی گونلرینین بیرینده قدیم گؤی مسجید کوچه‌سینده دونیایا گلن «علی میثمی تبریزی»باره‌سینده بیر یازیمی بیرداها اوخوجولارینیزلا بیرلیکده اوخویاق. قئید ائتمه‌لیم کی، بو یازینی ۲۰ ایل قاباق تبریزده چاپ اولان دیرلی ارک روزنامه‌سینده «ایللرین قانادیندا» باشلیقلی سئریال ادبی مقاله‌لریم آراسیندا چاپ ائتدیرمیشدیم و سونرا «ایللرین قانادیندا» آدلی شعیر آنتولوژیسی کیتابیمین بیرینجی جیلدینین ۸۰-نجی صحیفه‌سینده چاپ ائتدیرمیشم/ سایغیلارلا : ۵ دی – ۹۵ – قاراداغ-ائل اوغلو
***
«میثمی» ؛ اوره‌یینده همیشه یاشیل باهار گؤیه‌رن شاعیر(دوغوم ایلی ۱۳۰۲ گونش ایلی)
معاصر ادبیات تاریخیمیزین یازیسیز قالان آغ واراقلاری، اونون یازیلی صحیفه‌لریندن نئچه قات آرتیقدیر. چوخ سایدا اولان شاعیر و یارادیجیلاریمیز هله‌ده اؤز اثرلرینی چاپا یئتیره بیلمه‌دیکلرینه دایر، عموم کوتله آراسیندا تانینا بیلمه‌میشلر. یئتمیش بئش ایل اؤنجه محتشم تبریز شهرینده، اصیل بیر تبریزلی عائیله‌‌سینده دونیایا گؤز آچان شاعیریمیز اوستاد علی میثمی فارس و تورک دیلینده اونودولماز اثرلر یارادان قدرتلی شاعیرلریمیزدندیر. یاریم عصردن آرتیقدیر کی هر ایکی دیلده گوجلو شعرلر یازیر. شعرلری صنعت ذیروه‌لریندن قوپان رایحه‌لره بنزه‌ییر. پوئتیک اثرلرین شاعیری‌دیر. اؤز اثرلرینده همیشه یاشاما، توپلوما و بوتون بشرییت اوچون قایغی‌سینی گؤسته‌ریر.
او حیاتدا سئوه- سئوه یاشاییبدیر، یانماق اوچون یاشایان بیر حقیقی شاعیر انساندیر. اونون شعرلرینده اولان یانقی ایله اویانارلیقدان تؤره‌نن احساسلی مصراعلاردیر. شعر حاقیندا کسگین نظر صاحبلریندندیر.
شعرده تنقیده لایق اولابیلن بیر نقطه هئچ واخت اونون ایتی باخیشلاریندان یایینماق امکانی تاپا بیلمز. صلابتلی مصراعلاریندا ایسه اوخارلانمیش ایتیلیگی یاتیبدیر. کلاسیک و سربست فورمالاردا و داها آرتیق غزل ژانریندا شعرلر یازان اوستاد میثمی‌‌نین شعرلر توپلوسونون چاپ اولونماسی شککسیز اولاراق ادبیات خزینه‌‌میزه یئنی‌لیکلر آرتیراجاقدیر. قیرخ آلتی ایل بوندان قاباق امپریالییزمین اوچونجو دنیا آدلانان ملت‌لره قارشی حربه ـ زوربالارینا و او زامان اوچونجو دونیا ساواشی‌نین سکسکه‌‌سیندن آسیلی اولاراق یازدیغی صُلح شعری واختیله ایران اؤلکه‌سینده اولان صُلح سئوه‌رلر طرفیندن آلقیشلارلا قارشیلانیر، صُلح پرستشکارلاری طرفیندن یغینجاقلار و میتینگ‌لرده صلح مارشی کیمی اوخونور. عادتاً حیاتدا اولان شاعیرلرین حاقیندا سؤز گئده‌رسه، اونلارین سون شعرلریندن اؤرنگ اوچون اوخوجولارا تقدیم ائده‌رلر، آنجاق الینیزده اولان تقدیمات کیمی حاضیرلادیقیم مقاله‌نی یازدیغیم چاغدا، یئنه امپریالیستلرین میلیتار قوه‌لری فارس کؤرفه‌زینه هوجوم چکمیش کیمی آخیندادیرلار. او قارا قوه‌لر اؤزلری قونداردیقلاری «عراق بحرانی»نی بهانه ائله‌میش، فاغیر عراق جاماعاتینی داها دا قره گونلره چؤکدورمگه گلیرلر. گؤرونورکی امپریالیستلر طرفیندن، ایندی ده صُلح مسئله‌سی تهلکه‌لر آلتیندادیر. ایسته‌ردیم یئنه اوستاد «میثمی»نین قیرخ آلتی ایل اؤنجه یازدیقی صُلح شعری‌نین بیرده اوخوجوسو اولاق. اونون سایر اثرلری ده بئله‌‌دیر. هاچان اوخوماق ایسته‌سن تاپ-تازادیر. اونون اوره‌یینده بیر یاشیل باهار همیشه گؤیرمکده‌دیر. اوستاد شاعریمیزین آرزی چیچکلری سولماسین دئیه، انسان سئور شاعریمیز اوستاد میثمی حضرتلرینه شانلی عومور سعادتلی گونلر آرزولاییرام. قوی دونیامیزدا باریش، دوستلوق، امن آمانلیق حؤکوم سورسون. بیرداها اونون اثرلرینه مراجعت ائدیریک.
صلحون نغمه‌سی
قوی آغ گؤیرچینلر اوچسون گؤیلرده
قوی صُلحه سس وئرسین ائللر هر یئرده
قوی حقّین اوزوندن آچیلسین پرده
چالینسین ائللرین شن ترانه‌سی
هیتلر مکتبیندن درس آلانلارین
ووروشما اودونو یاندیرانلارین
اوغورسوز بایقوش تک بانلایانلارین
بوتون اؤلکه‌‌لردن کسیلسین سسی
پارلاسین هر یئرده صُلحون اولکری
آچیلسین ائللرین آیدین سحری
قالماسین ظُلمتین، جهلین اثری
اوجالسین گؤیلره صُلحون نغمه‌سی
صُلحه سس وئریلسین بوتون جاهاندا
بئشیکلر بومبادان قالسین آماندا
قیزیل گوللر آچسین آذربایجاندا
بزه‌نسین امکدن حیات صحنه‌سی
سئوگیلیمه…
من سنین عشقینی ائتدیم اختیار
بوتون گوزه‌للرین حوسنو سنده وار
لاله‌تک قلبیمی ائدیر داغدار
لاله‌یه بنره‌یه‌ن یاناغین سنین
سالدی منی مین آزارا گؤزلرین
قلبیمه چوخ ووردو یارا گؤزلرین
آغ گونومو ائتدی قارا گؤزلرین
سینه‌می داغلادی فراقین سنین
وفالی عاشقم ائل‌بیلیر،هامی
شعریم‌محبتدن آلیر الهامی
قارانلیق بورویر فیکیر دونیامی
قلبیمده یانماسا چراغین‌سنین
وفالی عاشقیم ائللر عاشقی
حقیقتدن دئیه‌ن دیللر عاشقی
بیر بولبولم قیزیل‌گوللرعاشقی
اوچوپ قونان یئریم بوداغین سنین
شرط‌لی عشق
من سنی سئویره‌م نازلی دلبریم
گل‌سنده بو ائلی، بو وطنی سئو
سن منی عشقینده امتحانا چک
دوزگون عاشق اولسام، سنده منی سئو
سئوگیلیم، عاشقم گول یاناغینا
شکر سؤزلرینه بال دوداغینا
قوی قدم شوقیلن آرزی باغینا
من بیرشیدا بلبل، سن چمنی سئو
بوائلی بودیلی بو وطنی سئو
من سنی سئویره‌م، سنده‌منی سئو
