اوخوجولارینیزدان یاردیم ایسته‌ییرم
دوقتور فیروز رفاهی

ایضاح:
تانینمیش دیلچی عالیم دوقتور فیروز رفاهی‌نین «ایشیق» سایتینا گؤندردیگی مکتوبوندا «احمد شوقی تبریزی»یه منسوب بیر فارس دیوانیندا نوقطه‌سیز یازیلمیش تورکو بیر غزلین اوخونوشونا یاردیم ایسته‌نیلیبدیر. آشاغیدا حؤرمتلی دوقتور فیروز رفاهی‌ موعللیمین مکتوبویلا برابر اشاره اولونان نوقطه‌سیز یازیلمیش شعری‌ده وئریریک. بو شعری اوخویان هر هانکی بیر اوخوجوموزون آدینی و اونا دایر دوقتور فیروز رفاهی موعللیمین ایضاحینی‌دا سایتیمیزدا وئره‌جه‌ییک.

حؤرمتله: «ایشیق»

***

دوقتور فیروز رفاهی‌نین «ایشیق» سایتینا گؤندردیگی مکتوبو

سلام عزیز دوستلار!
بیلیرسیز کی، بو یاخینلاردا “احمد شوقی تبریزی”- نین تورکی دیوانینی چاپ ائله‌دیم و سیزین سایتدا دا اونو اوخوچولارینیزا هدیه ائتدیم. من شوقی‌نین فارسجا دیوانینی آختاریشیندایام و بونو ادبیاتیمیز اوچون بیر تؤحفه حئساب ائدیرم.
بو یاخینلاردا ألیازمالار آراسیندا بیر توپولویا راست گلمیشم کی، اورادا “شوقی” تخلوصو ایله قصیده، مثنوی، غزل و رباعی وار. هله لیک اونون اوزه‌رینده چالیشیرام کی، گؤروم بو همان “احمد شوقی تبریزی”-دیر یا باشقا شوقی. شوقی آدیندا ایران ادبیاتیندا چوخ وار. آمما تورک اولان شوقی بیر نفر (هله لیک) وار.
بو مجموعه‌نی اوخویاندا غرللری آراسیندا بیر تورکجه غزل ده موشاهیده ائتمیشم. بو توپولونون چتین و ماراقلی طرفی بودور کی، بوتون شعرلر نوقطه‌سیز یازیلیبدیر.
ایندی سیزین اوخوجولارینیزدان یاردیم ایسته‌ییرم. من تورکجه غرلی سایتا گؤندریرم. خواهیش ائدیرم اونو اوخوجولارینیزا چاتدیرین گؤرک اونو کیم اوخویا بیلر. اوخویانا جایزه وئرمک شرایطینده دئییلم، آما اونا بیر لقب وئرمک اولار. «دیلینی یاخشی بیلن شخصیت».
یاردیم اوجون غزله بیر آد وئردیم. غرلین آدینی “ائتمدین” قویدوم. بیلیرم اگر غزل فارسجا اولسا اونو هامی اوخویار، آنجاق گؤرک اونو دیلیمیزده نئجه اوخویورلار. بونو بیر یاریشما حئساب ائدیب، یاریشماجیلارا اوغورلار آرزو ائدیرم. أیر بونو اوخویان شاعر اولسا داهی باشی اوجالیق اولار.
سیزه ایشلرینیزده اوغورلار آرزو ائدیرم.

ساغ اولون