اوزوقویلو اؤلن کؤرپه‌یه آچیق مکتوب
نیگار خیاوی
اوزولمه آناسینین بالاسی!
اؤزوموزو تئز یئتیردیک باشیوین اوسته و سون مدل آیفونلاریمیزلا شکیل چکدیک اؤلومونون بوتون یؤنلریندن؛ چونکو بیز، شیشه-شیشه اونلاری بیر-بیریمیزه گؤستره‌جه‌ییک؛ چونکو بیز نئجه ده چوخ مهربانیق!
سن بیلمزسن،
او اوزو قویلو اؤلومونون ساحیلینده کی کؤپوکلردن ده داها کؤپویوک بیز؛ بؤیوک احتماللا هامیمیز آجی شعرلریمیزده سنی اوخشایاجاییق؛ قارا رسیملر چکه‌جه‌ییک؛ چونکو بیز دریالارین دیبینده‌کی آمیب‌لردن ده عاغیللی‌ییق.
قوی سنینله دردلشیم آناسینین اوره‌یی‌نین بندی!
سن اؤلومله تک جانینا اوزلشنده، اؤزونه جنازه تؤره‌نی توتاندا، دموکراسی جنابلارینین یوخوسو اصلا گؤزلریندن قاچمادی.
سنین اوزوقویلو جنازه‌نی مین اینچ‌لیک L.E.D تئلویزیونلاریندا سئیر ائدنده، بشر حقوقلاری‌نین هئچ بیریسی اؤزونو آیاقلانمیش حساب ائتمه‌دی.
قوربان اولوم سنین هله ده اومود بسله‌ین باشماقلارینا،
دالغالارلا دوست اولان باشماقلارینا؛
نه یئکه بشر حقوقلاری‌ییق بیز!
نه هئیوه‌ره دموکراسی‌ییق!
نئجه ده مدنیتلی، نئجه ده سوسیته و مهربان، بمبالی کؤپوکلریک بیز!
گؤرورسن‌می کونفرانس میزلرینین اورتاسیندا کؤینه‌ییوین قیرمیزیلیغی نئجه پاریلداییر؟
گؤرورسن شیخ‌لر، فوقوللولار، شلمه‌لی‌لر، امیرلر، دمیرلر شیرین یوخونون آرخایینلیغینا نئجه ده تولکو-تولکو زیلله‌نیبلر؟
ای منیم میقاووا انسانلیغیم! هانسی فابریکانین الده دوزلمیش اورونوسن سن؟ مالاتینا هئچ اوتانان صیفت قاتیلمادیمی؟ هانسی الده دوزلمیشسن؟ بونجا بورنو یئللیجه گیردکان آغاجلی گیرده ماسالار آرخاسیندا نئجه‌ده اؤلکه بؤیوکباشلاری، نئجه‌ده دموکراتلار، پارتییالار، لابوراتورلو عالیملر، نه اودکولونلار، نه کت شالوارلار، آخ… دموکراسی بوللوغوندان آز قالا پارتلاییریق بیز، اوغونوب کئچینمکدن آز قالا ییرتیلیریق. خومار گؤزلریمیزدن نه یئکه، نه شیق گؤزیاشلاری فانتاللاییریق!
کونفرانس‌لارین، توپلانتی‌لارین، قورولتای‌لارین، سفرلرین، فئستیوال‌لارین، ماسالارین، تریبون‌لارین، هاف هافلارین، قودقودلارین، های های‌لارین، قایناشمالارین، قوردلاشمالارین و ایندیدن نوبل یاریش موکافاتی اوزه‌رینده چکیش برکیشمه‌لرینه نییه آغلامیرام من؟
کیم ایدی دئدی: بیر-بیرینیزین باشینی یارمایین؛ دونیادا هامییا چاتاجاق قده‌ر سئوگی وار؟ کیم ایدی؟ سن باشلا، قارا یئلپنک‌لرینی باشدان سای منیم بالام!
هادیر اول، قانادلارینی وار گوجونله گوجلو یاپیشدیراسان!
بلکه اونلار دادینا چاتسینلار.
۱۳شهریور۹۴ تبریز
یک پاسخ
واقعن متاسفم.کسی نمی تونه دین، مذهب، جنسیت، ملیت و… رو از کسی بگیره؛ مثله دین حل بشه، می مونه مذهب، اونم حل بشه، می مونه ملیت، اونم حل بشه می مونه جنسیت؛ این که زن است یا مرد و مشکلات اونا؛ خلاصه با این حساب تا دنیا دنیاست باید هی جنگ بشه؛ بهترین راه اینه تعصباتو کنار بذاریم و همه آدما انسانیت داشته باشیم و مثله یک خانواده همو قبول کنیم؛ خیلی نامردیه اگه کسی اون قد خودشو دوست داره، اما به خاطر خودش باقی رو قطع نفس کنه؛ دنیا خیلی کوچیکه و ارزش این همه نامردی رو نداره؛ به امید روزی که نه استعمار نوینی باشه و نه استثماری و نه متعصبی و نه افراطی ای… آمین