کئچمیشه باخاندا قیرخ ایل بوندان اؤنجه بیر قونشونون یاشامی هَله‌ده اوره‌ییمی یاندیریب یاخیر. بیر کَنددن گلمیش عائله کی بئش باش‌ایدیلار. بؤیوک اوشاق “اکرم” آدیندا بیر قیزیدی. دوققوز یاشیندا اولاردی. او عائله یاپ اَلی یالین کنددن کؤچوب تبریزه گلمیشدیلر. اکرمین آتاسی بیر قوروموش عاجیز کیشیدی و فحله‌لیگه گئدردی. بیرگون ایشلردی، ایکی گون ناساز اولاردی. اولارین داوارانیشی چوخ چَتینیدی. ائله اولدوکی ائو کیراسی وئرنمه‌دیلر. بیر قونشو او قیزین الیندن توتوب آپاریب کدخدا کارخاناسینا ایلمه سالماق اوچون تاپشیردی. بیر کؤهنه داخما ائو واریدی کدخدانین بونلارا رحمی گلیب وئردی اولارا کی اوردا کیراکیش اوتورسونلار. اکرم ده اونا ایشله‌ییب و آتاسی‌دا کدخدایا قوللوقچی اولسون ائوین کیراسینین عوضینده. قرار اولدو اکرم اوردا سحر تئزدن گون باتانا قده‌ر ایلمه سالسین.
کارخانا بیر قارانلیق اوزون کالاواییدی؛ تکی تورپاقلیق‌ایدی کی سو سپردیلر توز اولماسین. اکرم بیر آز یاواش ایشله‌سیدی  خَلفَه‌لر  آرخاسیندان بیر اوخلو چکردیلر و او آغلایا-آغلایا ایلمه سالاردی. کارخانادا نئچه دانا خیردا بویلو قیز و اوغلان اوشاغی ایشلییردیلر. اوشاقلار ایپ قیران پیچاقلا بارماقلارینین باشین کسسیدیلر او گونون موزدو یئتیشمزدی اونلارا و ائولرینه گوندرردیلر. او گون آنالاری اولاری وروب چؤرکده وئرمزدی یئمکلرینه. بونلار جمعه‌لر حاماما گئدردیلر و بیر آز دینجه‌لردیلر.
یاندیریجی قیشین سویوغوندا اکرمین قالین پالتاری اولمادیغی اوچون هئی ناخوش اولاردی و آناسی چاراسیزلیقدان ساواشاردی کی: “دور گئد ایشیوه، گؤرمورسن کئچینه بیلمیریک؟ بئش باش ائوده آجیم اولا-اولا بوگون سحر بیریده گلیر، من باشی داشلی نینیرم آخی اوشاغی؟ آتان دئییر بلکه اوغلان اولدو، مندن سونرا سیزه کمک اولار. آچیلان سحردن گئد ایشیوه ها!!”
زاوللی بالا اوجانیله دوروب گئدردی ایشه. بیر گون خلفه‌لرین بیری گؤردو اکرم اوسگوردو و آغزیندان قان گلدی. آتاسینی چاغیریب دئدی قیزین قان قوسور. او دئدی بیلیرم بابا چوخداندیر، هئچ زاد اولماز. بیز یوخسوللارین جانی درده اورگه‌نیب، نئیله‌مک؟!! قیز آخیندی آتاسی قیزی دالینا آلیب گتیردی ائوه. اکرم بیرده قان قوسدو. داها جانیندا هِئی قالمادی. آپاردیلار حکیمه و او دئمیشدی کی قاب قاشیغیزی بوندان آییرین، “سیل” مرضی توتوبدو بو قیز. ائوه یئتیرن کیمی آناسی دئدی: اؤل باشی داشلی، ایشله‌مه‌یین دردیندن هر پئشه گئتدین باشیما.
هاوا آلاتورانلیغیدی. قارلی کولک یامان اسیردی. بونلارین یاناجاغی دا یوخودو. یوخسوللوق قم سازینی چالیردی. بیردن گؤردوک هارای قوپدو؛ چیغیرماق-باغیرماق سسی محلله‌نی بورودو. گئدیب گؤردوک اکرم‌گیلین قاپیلاری شولوقدور. مچیدین میجورو “مَشد یوسوف” بیر تابوت گتیریب، اکرمی قویدولار اونون اوستونه. بو زاواللی قیز گودک  یاشامیندا نه یئدی؟ نه گئیدی؟ نه دولاندی؟ قارا  گونلر بوغوب توپراغا تاپشیرد.
یوخسوللوق الیندن اؤلنلر چوخودو، تک اکرم ده‌ییردی. بیریسی دام کوروینده دامدان دوشوب اؤلردی، بیریسی قیرخ آیاق چشمه‌ده دوشوب بوغولاردی و مینلر اونلارا بنزر یوخسوللوق الیندن اؤلنلر. سیل نوخوشلوغو، ذات‌الریه نوخوشلوغو، چیچکدن، قیزیلجادان اؤلن اوشاقلار داهادا چوخودو. بؤیله دورومدا یاشام سورمک چوخ چتین‌ایدی.
او گونون اومیدیله کی خیردا اوشاقلار ایشه گئتمه‌ییب، درسه گئدیب شن یاشاسینلار. من اکرمله دوست اولماغیما گؤره قوبارلانیب بئله بایاتی چاغیردیم:
خالیم داردان کسیـلـدی
مئینه  واردان کسیـلـدی
داخما ایشیق گؤرمه‌دی
الیم یـاردان کسیـلـدی

ایلمه سالدیم بوتـامـدان
الـیـم کسـر تـوتـانـدان
اوخول یولون دئییشدیم
داخما یولون تـوتانـدان

گؤز آچدیم داری گؤردوم
آغ گـولـو ساری گؤردوم
ظـالـیـم فلـک الـیـندن
قـمی قـوبـاری گؤردوم

تبـریـز فرشی ایپکـدن
دفـه ووردوم اورکــدن
دردلی چنگی چالمادان
قولوم دوشـدو بیلکـدن

ایلمه‌چی‌لر توخودو
داردا بولبول اوخودو
آیاق گزر اَل یئریـن
هئچ خیریم یوخودو

ایلمه سالدیـم قـاردان
آل- قیرمیزی بویـادان
سؤیله گوناهیـم ندیـر
یئـری گـویـو یـارادان؟

آه چـکـدیــم فغـان اولـدو
تئـللـریم یـان- یـان اولـدو
کؤکسوم دردی دئشیـلـدی
خــامـالار  آل قــان اولــدو

گـل آنــا بیــزلــره بـاخ
حسـرتلی گــؤزلـره بـاخ
آرخامدا خلفـه وئـرمیش
اوخلولو ایــزلــره بـــاخ

آغیـزلاردا سؤز اولـدوم
تاپدالانمیش ایز اولدوم
یاشامدا بوی آتمـادیـم
قؤرایکن مَویـز اولـدوم
۴/۳/۹۴