تانینمیش شاعر “عاصم اردبیلی” دونیاسینی ده‌ییشدی
یاییلان خبرلره اساسن تانینمیش آذربایجان شاعری و اردبیل ادبی محیطینین آدلیم‌لاریندان اولان شاعر “عاصم اردبیلی” ۷۳ یاشیندا دونیاسینی ده‌ییشمیشدیر. شعرلرینده “عاصم” تخلص ائده‌ن “صالح عاصم کفاش” ۱۳۲۰ینجی ایل اردبیل شهرینده دونیایا گؤز آچیر؛ یئنی‌یئتمه‌لیگیندن ادبیاتا و خصوصیله شعره ماراق گؤستریر و فارس و آذربایجان دیل‌لرینده شعرلر یازماغا باشلاییر. عاصم دیپلوم آلاراق معللیملیگی پئشه سئچیر و تدریسله برابر تحصیلینه‌ده داوام وئریر و ۱۳۵۷ینجی ایل “دانشسرای عالی”دن انگلیس دیلی اوزره لیسانس آلیر. بو ایلدن سونرا عاصم بیر انگلیس دیلی معللیمی کیمی اردبیل مدرسه‌لرینده تدریس ائدیر.
بیز، آذربایجان ادبیات و اینجه صنعت(ایشیق) سیته‌سی امکداشلاری آدیندان بو ایتگینی شاعر عاصم اردبیلی‌نین مؤحترم عائله‌سینه، دوست و تانیشلارینا و ائله‌جه‌ده ادبی جمعیتیمیزه باش ساغلیغی وئریر و بیر شعرینی گتیرمکله خاطیره‌سینی عزیزله‌ییریک.(۱۴ اردیبهشت ۱۳۹۳)
“سوری” پوئماسیندان بیر پارچا
من ایستیرم اؤزومو آغلایام نه ائتمه‌لییم؟؟
اؤلن دیلک‌لره یاس ساخلایام نه ائتمه‌لییم؟؟
من ایستیرم کؤزه‌ریب اود کیمین کول اولسامدا
قارانلیغین اوره‌یین داغلایام نه ائتمه‌لییم؟
چوخ ایستیرم؟ قوناغیم اولسا شعریمین پری‌سی
قیزیل غزل قولونا باغلایام نه ائتمه‌لییم؟
من ایستیرم سویو چاتدیرماغا یارین باغینا
جوشوب شلاله کیمین چاغلایام نه ائتمه‌لییم؟
منیم ده اوخشاماغا محتشم دیاریم وار
صفالی باغچالی‌یام، باغلی‌یام نه ائتمه‌لییم؟
اؤزوم‌ده یاسلی، گؤزوم‌ده، سؤزوم‌ده، شعریم‌ده
آچیق دئییم ساوالان داغلی‌یام نه ائتمه‌لییم؟
… و ایستیرم نه عطا اولسا عاصمه ائلد‌ن
سیزه‌ده بیر نئچه پای ساخلایام نه ائتمه‌لییم؟
3 پاسخ
سلام
آللاه رحمت ائله سین.
بیزلرده مد اولوب ده‌یرلی اینسانلاریمیز اؤلندن سونرا بیله‌ریک وار ایدیلار!!! بوندان سونرا عاصیم رحمتلیگین شعرلری هر یئرده گؤرونه جک، کیتابی ساتیلاجاق، آدی دیللره دن دوشمه یه جک و…!
اورمیه لی دیرلی شاعیریمیز رحمتلیک دده کاتیب اؤلمه میشدن اؤنجه کیتابلارین چوخلاری تانیمیردی. اؤزو یاد اولونموردو و… . آللاهین رحمتینه گئدندن سونرا غربی آذربایجان دا هامی اونون کیتابلارین آختاریردی!!!
ایندی ایسه نئچه ایلدیر هله ده اونون شانیندا اولان بیر مزارلیق تیکدیریلمه ییب.
آللاه بونلارین هامیسینا رحمت ائله سین. بو بؤیوک اینسانلار دیلیمیزه چوخ زحمت چکیبلر.
اینشاللاه ده‌یرلی اینسانلاریمیزین ساغ ایکن قدیرلرین بیلیب حؤرمتلرین ساخلایاق.
Dəyərli şairimiz, rəhmətlik Asim Ərdəbili-nin acı ölüm xəbəri ürəyimizi dərindən kədərləndirdi. Bu vasitə ilə Onun hörmətli ailə üzvülərinə, yaxınlarına başsağlığı verir və ulu tanrıdan ulu şayrimizə rəhmət-şəfəqt habelə qalanlara dözüm diləyirik! Ruhu şad, məzari nur ilə dolsun!
خدایش رحمت کند شعر <سوری(جهنمده بیتن گل)اورا درابیات ترکی ماندگار کرد