اورمولو شاعر، یازیچی و زحمتکش‌لر اوردوسونون مبارز اوغلو اوستاد «حسن صانعی»، «کانون نویسندگان ایران»ین قدیمی اویه‌سی تهراندا حیاتا گؤز یومدو.
آدی قالارقی شاعر اوستاد «حسن صانعی» ۱۳۲۲ده، اورمودا حیاتا گؤز آچمیشدی. اوستادین عؤمرونون گنج گونلری وطنیمیزین ان فیرتانالی گونلری‌له مصادف اولموشدو. حسن معللیم او آغیر گونلرده ائلی دئییب، وطنی دئییب، وطنیمیزین زحمتکش‌لرینین آزادلیق اوغروندا آپاردیغی گرگین مبارزه‌سینه قوشولموشدو. حسن معللیم آزادلیق یولوندا، خالقین سعادتی یولوندا تکجه شعری‌له، یازیسی ایله یوخ، بلکه بوتون وارلیغی ایله مئیداندا اولموشدو.
60-ینجی ایلین باهاریندا حسن معللیمین کیچیک یاشلی بالاسی (میترا صانعی)نی، تهرانین آزادی مئیدانیندا قارا قوّه‌لر، ارتجاعی قوّه‌لر قیزیل قانینا بله‌میشدیلر. حتتا بئله بیر حادثه ده، حسن معللیمی سوسدورا بیلمه‌دی، او سون نفسینه قده‌ر اؤز خالقی ایله باغلادیغی عهد- پیمانا وفالی قالدی؛ آغیر- عذابلی گونلر، دهشتلی هجمه‌لر اونو یازیب، یاراتماقدان، عمل مئیدانیندان اوزاق سالا بیلمه‌دی.
حسن معللیم تهراندا آنا دیلینده یازیب، یارادان شاعرلرین، انجمن‌لرین دایاغی ایدی.
«ادبیات سئونلر» بو آجی آیریلیغی حسن معللیمین عایله‌سینه، وطنیمیزین زحمتکش‌لرینه، حسن معللیمین قلمداشلارینا، سئونلرینه باش ساغلیغی وئریر.
اوستاد حسن صانعی‌دن بو گونه‌جه اوچ کیتاب ایشیق اوزو گؤروب: «شکوفه می‌نوشد باد ۱۳۸۸»، «این رودخانه مال من است ۱۳۹۰» و «جمع‌آوری آب در آبکش ۱۳۹۷».
آدی قالارقی، ابدی خاطیره‌سینه عشق اولسون.
ادبیات سئونلر
۱۴۰۴,۵,۶
