“ایشیق” اوچ یاشینا دولدو…
شهریورین اون ایکیسی “ایشیق”- آذربایجان ادبیات و اینجه‌صنعت درگیسی-نین اوچ یاشی تمام اولدو. ۱۳۹۰ینجی ایل، ۱۲ شهریورده ادبی فعالیتینه باشلایان ایشیق درگیسی، بو گونه کیمین آذربایجان ادبیات و اینجه صنعتینده یازیب یارادان حؤرمتلی و عزیز شاعر، یازیچی و صنعتکارلاریمیزین امکداشلیغیندان جیددی صورتده بهره‌له‌نیبدیر. اونلارین بو عوض ائدیلمز امکداشلیقلارینین سایه‌سینده‌یر کی بو الکترون درگی اوچ ایل تمام یایدیغی ادبی مدنی اثرلرله آذربایجانیمیزین ادبیات و اینجه صنعتی اینکیشافیندا آزاجیق‌دا اولسا آددیملار آتیبدیر. بونا گؤره‌دیر کی بیز “ایشیق” درگیسی‌نین اوچ ایللیگینده یئنه‌ده سیزلردن بوللوجا تشکر ائتمک و دوستلوق و امکداشلیق اللرینیزی یولداشجاسینا سیخماغی اؤزوموزه بیر وظیفه سانیریک. هامینیزا اؤز تشکرلریمیزی و منتدارلیغیمیزی بیلدیریریک عزیز و حؤرمتلی آذربایجان شاعر، یازیچی و صنعتکارلاری. یئنه‌ده سیزدن امکداشلیق اوموروق. بو اوجاق یالنیز و یالنیز سیزین منتظم و کؤنوللو امکداشلیغینیزلا گور یانا بیلر، ایشیق ساچا بیلر.
حؤرمتله: ایشیق- آذربایجان ادبیات و اینجه صنعت درگیسی
3 پاسخ
زحمتینیز تقدیره لایقدیر. یولونوز آواند اولسون……………….
گون او گون اولسون کی ایشیق نئچه یوز ایللیک اولسون. ایشیق الکترون درگی سی نین امکداشلارینین زحمت لرینی دَیرلندیریب و هامیسینا اولو تانریدان جان ساغلیغی دیله ییرم. ساغ اولون.
اوغورلار اولسون آنا دیلیمه چالیشان هر کس یورولماسین