آذربایجان ادبی- مدنی درنک‌لرینین بیان‌نامه‌سی
دونیا سندن کیملر کئچدی…
(مجید امین مؤید؛ ۱۶ خرداد ۱۳۰۹- ۶ خرداد ۱۳۹۳)
ازلدن بئله‌دیر چونکی کائینات
جاهان دائمی‌دیر، عؤمور امانات
الدن اله کئچیر وفاسیز حیات
بیز گلدی- گئده‌ریک سن یاشا دونیا !
دونیامیز یاشایاجاقدیر و یاشاداجاغیق اونو بیز؛ نئجه کی سن یاشاتدین و سئودین دونیالیغی.
انسان یاشایاجاقدیر و سئوه‌جه‌ییک اونو بیز؛ نئجه‌کی سن یاشاتدین و سئودین انسانلیغی.
یوخلوغونو دونیا وارلیغینا کئچه‌جه‌ییک و حسرتینه بیر باهار پنجره‌سی آچاجاغیق دونیا بویدا؛ اوردان باخاجاغیق قارداشجاسینا استقبال ماهنیسی اوخویان آغلی، قارالی انسانلارا. نئجه کی سن باخدین عؤمور بویو بو پنجره‌دن بئشیگی قان قوخوسو وئره‌ن قیزیل بیر باهارا، و اوره‌یی امین-آمانلیغا چیرپینان یارالی دونیایا.
عؤمرونون بزه‌یی اولدو آغریلاریندا، آجی‌لاریندا باهار تراوتی؛ و اوره‌ک تئل‌لرینده سسلندی اینام، سئودا و انسان محبتی. یاشادین، یاراتدین، سئودین، سئویلدین. نه آنا تبریزین قاراگیله‌سینی اونوتدون؛ نه بو اؤلکه‌نین داشینی آتدین. وطنین اودپارچاسی‌لا قیزیندیردین دؤیوش کوره‌سینی، و اؤلکه‌نین سسینه قاتدین دونیا سسینی. یاشادی اؤلکه‌میز؛ یاشادی دونیامیز، یاشاتدین اونلاری، یاشاتدین آغریلاریندا، آجی‌لاریندا او قیزیل باهاری.
نصیبین ایشیقلی دونیادا قارانلیقلار اولدو؛ اودا بیر گون یوخ، بیر ایل یوخ؛ عؤمورلوک؛ دوز بیر گنج انسان عؤمرو، دوز ایگیرمی ایله دوغرو. بونا باخمایاراق، باشینین اوستونده دالغالانان اؤلوم حؤکمو قارشیندا بوکولدو؛ انسان عشقی یاشاتدی یاشیل آرزولارینی، یاشاتدی سنی و یئنه‌ده گونش ساحیلینه دوغرو یؤنلتدی اینام یئلکه‌نینی. دیزه چؤکن قارانلیق اولدو و قارانلیق قوروقچولاری.
اوره‌یی‌نین یاغینی گؤز ببه‌یی‌نین ایشیغی‌ایله گیله- گیله اریتدین و تؤکدون بئیینلریمیزه؛ دوشوندوک و اؤیرنمک ایسته‌دیک.
گؤزلریمیزی نیویورک کؤچگونلرینین فلاکت دونیاسینا آچدین؛ و سرمایا دوشگونلرینین آلچاقلیغینی گؤستردین. اونلارین سیماسیندا دویدوق صینیفلی جمعیتین دهشتینی. دوشوندوک و اؤیرنمک ایسته‌دیک.
ایندی سون منزیل اؤنونده‌ییک. بیر داها او مهربان و معصوم باخیشلارینین دالغالارینا دالمایاجاغیق. بیر داها دوداغیندا چیچکله‌نن نجیب تبسمون عطرینی دویمایاجاغیق. آنجاق یوخلوغونو دونیا وارلیغینا کئچه‌جه‌ییک. نییه کی هله‌ده تبریز قاراگیله‌سی‌نین گؤزلری یول چکیر؛ هله‌ده قیزیل باهارین بئشیگیندن قان قوخوسو گلیر؛ هله‌ده بو یارالی دونیادا نیویورک کؤچگونلرینین دهشت صدالاری یوکسه‌لیر.
هانی بو دردلرین ملهمی؟ دوشونمک ایسته‌ییریک؛ اؤیرنمک ایسته‌ییریک مجید‌عمی!
صابر ادبی انجومنی
ساهر ادبی- مدنی درنه‌یی
نباتی ادبی انجومنی
آذری- ائل‌دیلی ادبیاتی فصلنامه‌سی
ایشیق- آذربایجان ادبیات و اینجه‌صنعت سایتی
۷ خرداد ۱۳۹۳
