نوبل ادبیات موکافاتی”آلیس مونرو”یا چاتدی
بو ایل (۲۰۱۳) ادبیات اوزره نوبل موکافاتینی ۸۲ یاشلی کانادالی یازیچی خانیم “آلیس مونرو” قازاندی. آلیس مونرو بو موکافاتی قازانان ۱۳ینجی قادین یازیچی‌دیر. اوندان اؤنجه آلمان یازیچیسی “هرتا مولر” ۲۰۰۹ینجی ایل بو موکافاتا لاییق گؤرونموشدور.
نوبل ادبیات موکافاتینی وئرن ایسوئچ(سوئد) آکادئمیاسی بو موناسیبتله یایدیغی معلوماتدا آلیس مونرونو “مودئرن قیسا حیکایه‌لر اوستادی” کیمی تقدیم ائتمیش و اونو “معاصر قیسا حیکایه ژانرینداکی اوستالیغینا گؤره” بو مکافاتا لاییق گؤرموشدور.
آلیس مونرو “کانادانین چئخوفی” کیمی تانینیر. ایندییه‌دک ۱۳ حیکایه کیتابی و بیر رومانی یاییلیبدیر. حیکایه‌لرینده کانادانین کیچیک کندلرینده یاشایان اینسانلارین حیاتلاریندان بحث ائدن “مونرو” سئوگی و اؤلوم کیمی موضوعلاری اؤن پیلانا چیخاریبدیر. اونون حیکایه‌لری‌نین آنا خطینی قادین موضوعسو: آنا- قیز، قیز- آنا- نوه، آتا- قیز موناسیبتلری تشکیل ائدیر.
آلیس مونرودان فارس دیلینده «فرار»، «رویای مادرم»، «دورنمای کاسل‌راک» و «دست‌مایه‌ها» عنوانلاری آلتیندا حیکایه‌لر مجموعه‌سی چاپ ائدیلمیشدیر.
یک پاسخ
آلیس مونرو هئچ بیر روماندا یاییلماییب بیلمیرم اطلاعاتیزی هارادان آلیسیز و اونلار هارادان آلیرلار آما آلیس مونرو ایندیه دک رومان یازماییب و بونو اصلاح ائله مه لیسیز و هر ۱۴ کیتابی (البته ۵ دانا دا سئچیلمیش حیکایله لریندن کیتاب چیخاردیب ۱۴ دانا دان علاوه) ده قیسا حیکایه کیتابی دیر. بلکه ده قیسا حیکایه دئمک اولمایا چون بعضی حیکایه لری ۸۰ و گاهدان ۱۰۰ و ۱۱۰ صفحه یه کیمین اولور