دونیا سندن کیملر کئچدی…!
حؤرمتلی وطنداشلار, دیرلی قلم صاحیبلری, عزیز صنعتکارلار!
آذربایجان ادبیاتی و مدنیتی‌نین تانینمیش سیماسی, گؤرکملی ادبیات خادیمی و دیرلی شاعری اوستاد آقازاده علیایی(علیا) آرامیزدان کؤچدو.
اوستاد علیایی آذربایجان یازیچیلار بیرلیگی‌نین فخری عضوی, کرج فرخی یزدی آدینا ادبی انجومنی‌نین قوروجوسو, آذربایجان ادبیات اوجاغی‌نین بانی‌لریندن بیری و ساهر ادبی- مدنی درنه‌یی‌نین آق‌ساققالی‌ایدی. او ادبیاتچیلاریمیز ایچینده گؤزل شاعر و دیرلی بیر شخصیت کیمی بؤیوک حؤرمته مالک بیر انسان‌ایدی.
اوستاد علیایی معنوی و مادی یاردیملاری‌لا اوزون ایللر ادبیاتیمیزین چیچکلنمه‌سی, انکشافی یولوندا وار گوجو‌ایله چالیشمیشدیر. ادبیاتچیلاریمیز آراسیندا معنوی کؤرپو اولاراق, اونلارین دوستلوقلاری و قلمداشلیقلاری اوغروندا الیندن گلنی اسیرگمه‌میشدیر. آذربایجانیمیزی شهر- شهر گزمیش, ادبی انجومنلریمیز و یازیچیلاریمیزین آراسیندا اونسیت قورموش, دوستلوق یاراتمیش و کشف ائتدیگی استعدادلاری اؤز حیمایه‌سی آلتینا آلاراق ادبی انجومنلرده اوزه چیخارمیشدیر.
اوستاد علیایی، آذربایجان ادبیاتی اوغروندا چوخلو آغری و اذیت‌لره قاتلاشمیش‌دیر. او دار گونلرده، برک آیاقدا ائوینی ادبیاتیمیزین ایستی اوجاغینا چئویریب، شعرمیزین، نثرمیزین، موسیقی‌میزین چیچکلنمه‌سینده بؤیوک فداکارلیق‌لار گؤسترمیشدیر. آنا دیلیمیزده‌کی غزل‌لری‌له، اوره‌کلری سئوینج، کؤنوللری دینجلیک، بئیین‌لری آیدینلیق‌لا سوسلو‌یه‌رک، انسان لیاقتینی اوجا توتموشدور.
بیز بو آغیر ایتگی مناسیبتی‌له اوستادین محترم عائله‌سینه, آذربایجان خالقینا, ادبی جمعیتیمزه و ایرانین ادبی- مدنی شخصیتلرینه باش ساغلیغی دیله‌ییر؛ اونون خاطیره‌سینی عزیز توتاراق, اوستاد! یولون داواملی اولسون!- دئییریک.
شهریورین ایکیسی- ۱۳۹۲
ساهر ادبی- مدنی درنه‌یی(تهران)
آذربایجان ادبیات اوجاغی(تهران)
صابر ادبی انجومنی(تهران)
یئنی تبریز ادبی- مدنی درنه‌یی(تبریز)
نباتی ادبی انجومنی(شهریار)
چنلی تئل ادبی انجومنی(میانا)
ایشیق گنجلری(تهران)
یک پاسخ
با تشکر از لطف دوستان و بزرگان هنر صمیمانه از همدردی شما سپاسگزارم
مهدعلیا علیایی