ادبیاتیمیزین بیر بوداغی‌دا قیریلدی: اوستاد “علیایی” ابدیته قوووشدو.
چوخ تاسوفله, تانینمیش آذربایجان ادبیات خادیمی, آذربایجان یازیچیلار بیرلیگی‌نین فخری عضوی و ساهر ادبی- مدنی درنه‌یی‌نین آق‌ساققالی قوجامان شاعریمیز اوستاد “آقازاده علیایی” شهریور آیی‌نین بیرینده آرامیزدان کؤچدو. کرج شهرینده یاشایان و تهرانین مسیح دانشوری خسته‌خاناسیندا ابدیته قوووشان اوستاد علیایی شنبه گونو عائله‌سی, دوستلاری و تهراندا یاشایان بیر تعداد آذربایجان شاعر و یازیچیلاری‌نین مشایعتی ایله بهشت زهرا مزارلیغیندا تورپاغا تاپشیریلدی.
اوستاد آقازاده علیایی ادبیاتیمیزا ائتدیگی خیدمتلرینه گؤره, ادبیات تاریخیمیزده قالارقی شخصیتلردن اولاجاقدیر. او ۱۳۰۶ینجی ایل باکی شهرینده مهاجر بیر عائله‌ده دونیایا گؤز آچیب, یئددی یاشینداایکن عائله‌سیله بیرلیکده کئچمیش سووئتلر آذربایجانیندان چیخاریلیب, آتا بابا اوجاغی اولان ساراب ماحالینین دوننی کندینده مسکونلاشیبدیر. سونرالار ساری, تهران و کرج شهرلرینده یاشاییب, اوزون ایللر فارس دیللی ادبی درنک‌لرده فعالیت گؤستریب, انقلابدان سونرا آذربایجان ادبیاتی‌لا ماراقلانیب و بو ادبیاتین انکشافیندا اونودولماز و چوخ دیرلی خیدمتلر ائدیبدیر. فارس دیلینده “ققنوس”، شگفتیها”، “بانگ پدر”، “ساقینامه” و “احساس من” و آذربایجان دیلینده “آذری نغمه‌لری” و “قانادسیز پروانه‌لر” آدلی شعر مجموعه‌لری یاییلیبدیر. او ادبیاتیمیزا ائتدیگی اونودولماز خیدمتلرینه گؤره آذربایجان یازیچیلار بیرلیگی‌نین فخری عضولیگینه سئچیلیب و شرفینه ادبی- مدنی درنک‌لر طرفیندن یوبلئی‌لر تشکیل ائدیلیبدیر.
اوستاد علیایی ساهر ادبی- مدنی درنه‌یی‌نین آق ساققال‌لاریندان اولماغینا باخمایاراق, بوتون آذربایجان ادبیاتی و اینجه‌صنعتی ساحه‌سینده فعالیت گؤسترن ادبی- مدنی درنک‌لرین جیددی حامیسی اولوبدور و اوزون ایللر بو درنک‌لرین قورولوب و ثمره‌لی فعالیت ائتمه‌لرینده اونودولماز رول اویناییبدیر.
اوستاد علیایی‌نین آنیم مراسیمی شهریور آیی‌نین دؤردونجو گونو(دوشنبه) یاشادیغی کرج شهرینده (فردیس‌ده) کئچیریله‌جکدیر. اوستادین سون سؤزونه اساسلاناراق بو مراسیم اونون شخصی ائوینده اولاجاقدیر.
بیز ادبیاتیمیزین اونودولماز خادیم شخصیتی و انسان‌سئور, وطنپرور شاعری اوستاد آقازاده علیانی‌نین شرفلی خاطیره‌سینه عشق اولسون دئییر و بیر داها خاطیرلادیریق کی:
ازلدن یارانیب چونکی کائینات
جاهان دائیمی‌دیر, عؤمور آمانات
الدن اله کئچیر وفاسیز حیات
بیز گلدی- گئده‌ریک سن یاشا دونیا!
“ایشیق” سایتی‌نین اداره هئیتی و ادبی شورا عضولری
اوستاد علیایی‌دن ایکی شعر:
(۱)
قارا گونلر قاراسین گوندوزه دؤندرمک اولار
بولبولو باغچالارا، باغلارا گؤندرمک اولار
قارا ظلمت تؤره‌دن کس قانا بیلمز بو سؤزو
عرشه‌ده چاتسا اونو عرشدن ائندیرمک اولار
آنلامیر خلقیمیزین “قوچ نبی”سی، “روشن”ی وار
فتح اوچون اونلاری‌دا میدانا گؤندرمک اولار
بمبالارلا بیلیرم سوسمایاجاق شانلی ائلیم
بیر یانار وولقان اولارسا اونو سؤندورمک اولار
قول- قولا وئرسه ائلیم دونیانی آزاد ائده‌‌ریک
دیل آچیب، شاعر اولوب ملتی دیندیرمک اولار
غم- کدر چولغاسادا اؤلکه‌می “علیا” بیلیرم-
دؤورانی گلسه یئنه ملتی گولدورمک اولار.
(۲)
اؤز آییم، اؤز اولدوزوم وار اؤزگه ماهی نئیلیرم
وار ساری تئل دلبریم، زلف سیاهی نئیلیرم
ناز باخیشلار کؤنلومو یوز دفعه مفتون ائیله‌ییب
بیر دؤنوب باخسا یاریم اؤزگه نگاهی نئیلیرم
ائل یولوندا چاشمارام، آیری طریق آختارمارام
من غریبه مسلکی، بیگانه راهی نئیلیرم
داغ تکین سؤیکنمه‌یه شانلی ائلیم واردیر منیم
اؤزگه‌لردن تکیه‌نی، پشت و پناهی نئیلیرم
بیر هارای وورسام جوشار سئللر کیمی قوچ بابکیم
خائن افشین‌لر سایاقدا دادخواهی نئیلیرم
“علیا” نازلی سئوگیلیم شاهددی عشق پاکیمه
عشقیمین اثباتینه آیری گواهی نئیلیرم.
2 پاسخ
اوستاد علیایی نین وفاتینی اونون حقیقی دوستلارینا ،آذربایجان ادبیات سئورلرینه ، شاعیر و یازارلاریناو محترم عایله سینه تسلیت دئییرم. آغیر ایللرین اونودولماز شخصیّتلریندن بیری ده اوستاد علیایی ایدی .اونودولماز کیشیلرین بیری ایدی. صاف اوریی، آیدین فیکری وار ایدی .گنجلیک ایللریمیزده بیزه و ادبیاتیمیزا چوخ سایغیلار بسله یه ن کیشیلردن اولدو .ریاسیز آدام ایدی. شاعیرلیگینه گوونمه دن اؤزونو ادبیات خیدمتچیلریندن بیری ائتدی. او چوخ بؤیوک اینسان ایدی. شعرلری باره ده دانیشماق ایسته میرم. اوزاق ایللرده تهران محیطینده اولان شاعیرلریمیزین گوزگو گؤسترمز یئرلرده کئچیردیکلری شعیر آخشاملاری داها آرتیق اونون هیمتیله اولاردی . اؤلومونو سایتدا اوخودوم و چوخ اوزولدوم .بللی دیر کی وفاتینین خبری لایقینجه عموم اوچون یاییلمامیش. بو بابتدن بیرداها دا اوزولدوم . روحو شاد اولسون، یولو داواملی…..تهران – ائل اوغلو/ ۳/۷/۹۲
یادیمیزدا – روحو شاد اولسون.
کیمدی ؟
نه قدر یازما یازیم
یازما اۆرک تۆستوسدی
قان ایچینده گؤزریر
من کاغاذا هی پۆلیرم،
بیر سوْیوق آرزی گلنده
آچیرام قوْل قانادی .
پارالانمیش اۆرگیم
زۆمزومه ائتمکده منه
کی گئدن گلمییجک
گئدی گلنمز یوْلونا،
اسگن یئل سۆرونور
هی قاپی یا تاقا چالیر
دئییرم اۆز اۆزمه
کیمدی گلیر؟
کیمدی گئدیر؟