چوخ تاسفله، یاییلان خبرلر اساسیندا تبریزلی خواننده و آکتیور «محمد یاری» اوره‌ک خسته‌لیگی سببیندن فروردین آیی‌نین ۲۱-جی گونو یاشادیغی تبریز شهرینده حیاتلا وداعلاشمیشدیر.
«خالوغلو» آدی ایله اؤزونون ساتیریک ایشلرینی ایفا ائدن استعدادلی خواننده محمد یاری ۱۳۸۰-جی ایلدن آکتیورلوق ایشلرینی باشلامیش و اول‌لر اؤز ویدئو کلیپ‌لرینی اینترنتده‌کی شخصی صحیفه‌لرینده پایلاشماقلا چیخیش ائتمیش، سونرالار خواننده‌لیک ساحه‌سینه داخل اولماقلا داها آرتیق تانینمیشدیر.
گنج صنعتکارین جنازه‌سی جمعه گونو تبریزین وادی‌رحمه مزارلیغیندا سئونلرینین گئنیش اشتراکیله و اؤزو اوخودوغو «قارا گیله» ماهنیسی‌نین سسی آلتیندا مشایعت اولوب، تورپاغا تاپشیریلمیشدیر.
ایشیق- آذربایجان ادبیات و اینجه صنعت سایتی- امکداشلاری آدیندان گنج صنعتکارین ایتگیسینی حؤرمتلی عائله‌سینه و سئونلرینه باش ساغلیغی وئریر، خاطیره‌سینی عزیزله‌ییریک.
ایشیق؛ آذربایجان ادبیات و اینجه صنعت سایتی
۲۲/۰۱/۱۴۰۴
