جمعه‌آخشامی، اسفند آیی‌نین دوققوزو، خوی زلزله‌سی سیویل یاردیملار ایله باغلی سندلشدیریلمیش متن‌لرین تقدیمات مراسیمی کئچیریلدی. بو مقاله‌لر، تجربه‌لر، مصاحیبه‌لر و اوشاقلارین خاطیره یازیلاری گؤرکملی آذربایجان یازیچیسی رقیه خانیم کبیری‌نین طرفیندن توپلانیب، ندای قلم درگی‌سینین ۵۳-جو نومره‌سینده، اؤزه‌ل سایی کیمی چاپ اولموشدور. بحران تجربه‌لرینین سندلشدیریلمه‌سی عمومیتده یایغین اولمایان و دقتدن کنار قالان بیر مسئله اولدوغو اوچون، بو اؤزه‌ل سایی، آذربایجاندا، بحران ساحه‌سینده نشر اولونان ایلک متن‌لردن ساییلا بیلر. بو اؤزه‌ل سایی آلتی بؤلومدن عبارتدیر:
بیرینجی بؤلوم: مقاله‌لر
ایکینجی بؤلوم: خوی، آرخانداییق!»
اوچونجو بؤلوم: مصاحیبه‌لر
دؤردونجو بؤلوم: تجربه‌لر و خاطیره‌لر
بئشینجی بؤلوم: ادبیات، اینجه‌صنعت و اکولوژیک بحرانلار
آلتینجی بؤلوم: اوشاقلارین خاطیره یازیلاری
تقدیمات مراسیمی خوی شهرینده، بلدیه بیناسی‌نین شهید برگزینی سالونوندا کئچیریلدی. مراسیم تانینمیش رژیسور محمدعلی مرادی جنابلارینین «اوشاقلارین روایتی» آدلی سندلی فیلمی ایله باشلاندی. فیلم باشا چاتاندان سونرا نوبتی اولاراق مهندس علی‌اصغر پاشازاده، رقیه خانیم کبیری، دوکتور توحید ملک‌زاده و مهناز خانیم اسلامی چیخیش ائتدیلر. مهندس علی‌اصغر پاشازاده زلزله گونلرینده ائل‌گوجو کمپی‌نین باش قوروجوسو اولاراق، بو کمپین قورولماق پروسه‌سی ایله یاناشی، بحرانلاردان دولایی کؤچ مسئله‌سینه توخوندو. رقیه خانیم کبیری بو اؤزه‌ل سایی اوچون تجربه‌لرینی گؤندرن مؤلف‌لردن تشککور ائدیب، بحران زامانینداکی تجربه‌لرین قلمه‌آلینماسی‌نین اهمیتی ایله، دیجیتال دونیادا آیاقدا قالماق اوچون اؤز مدنیتیمیزه دایاناراق، هر ساحهده تجربه‌لرین قلمه آلینماسی‌نین ضرورتینی قید ائتدی. دوکتور توحید ملک‌زاده زلزله گونلری خالقین استرسینی اورتادان قالدیرماق اوچون هر گئجه یوزلرجه مئساژا جواب وئرمک زوروندا قالدیغی گونلری خاطیرلادیب، زلزله‌نین علمی جهت‌لرینه اشاره ائدیب، زلزله ایله باغلی بیر سوال اورتایا قویدو. تاسوفله اونون سوالینا دوغرو جواب وئریلمه‌دی. بو دوروم خالقیمیزین زلزله حاقیندا یئترلی معلوماتا صاحیب اولمادیغینی گؤسترمکده‌دیر.
مهناز خانیم اسلامی ایسه ان.جی.او و سیویل یاردیم‌لارین اهمیتیندن دانیشیب، قوناقلارین ایسته‌یی ایله، فعالیت ائتدییی ساحهده، اورمو گؤلونون احیاسی ایله باغلی ده‌یرلی معلوماتینی اورتایا قویدو.
بیرینجی بؤلومون سونوندا، زلزله گونلریندن بئش دقیقه‌لیک بیر ویدیو پایلاشیلاندان سونرا، ساز ایله سؤز بیرله‌شیب، عاشیق غلامرضا اژدری‌نین دیلیندن سوزولن میکائیل آزافلی‌نین سؤزو ایله قوپوز سسی سالونون جدی اتمسفرینی ده‌ییشدیردی.
ایکینجی بؤلومون دانیشانلاریندان تانینمیش رژیسور محمد علی‌مرادی دوغال بحرانلاردان حاضیرلادیغی سندلی فیلم‌لریندن، اؤلکه ایچی ایله اؤلکه دیشی تجربه‌لریندن و دولتی یاردیملار ایله سیویل یاردیمجی‌لارین گوجلو و ضعیف طرفلرینه توخوندو. زلزله گونلری دوکتور احسان اکبری بحراندان درحال سونرا تعجیلی یاردیم‌لارین ضرورتیندن، بویلو قادینلار اوچون قورولموش اؤزه‌ل کمپ ایله داوا-درمانلاری تورپاق آلتیندا قالانلارین آجیناجاقلی دورمو ایله یاشادیغی تجربه‌لرینی اورتایا قویدو. سونونجو چیخیش ائده‌ن ائلناز خانیم خاکزاد ایسه زلزله کیمی دوغال بحرانلاردا صنعت و اینجه‌صنعتین ایشلوی و بو ایشین اوشاقلار ایله یئنی‌یئتمه‌لرین اوزره‌ینده‌کی فایدالی ائتکی‌سینه توخوندو.
دانیشیقلار باشا چاتاندان سونرا، زلزله گونلرینده رسم ائتدییی نقاشی‌سی درگی‌نین جلدینی بزه‌میش محصیل، اسرا مقدم صحنه‌یه چاغیریلیب، خاطیره اولاراق اونا هدیه پاکتی وئریلدی. اوسته‌لیک هر بؤلومون سونوندا آپاریجی، اطراف شهرلردن گلن دانیشانلاری آنیم پاکتی ایله مشایعت ائتدی.
مراسیمین سونونجو و اوچونجو بؤلومونده «موغام» موسیقی قروپو گؤزه‌ل ایفالاریلا سالوندا لیریک بیر اتمسفر یاراتدی. مراسیمین دوامیندا خوی شهرینین شهرداری، شورا رئیسی و رئیس سازمان سیما، منظر و فضای سبز ده سالونداکی قوناقلارا قاتیلدیلار . موسیقی قروپوندان سونرا، مراسیمین قوروجولارینین خواهیشی ایله شهردار تریبون آرخاسینا کئچیب، بئش‌دقیقه‌لیک دانیشیقلاریندا قوناقلارا خوش گلدین دئییب، زلزله گونلری خویون آرخاسیندا اولان انجمن‌لر، ان.جی.اولار، خیریه‌لر و حقیقی شخص‌لره تشککورلرینی بیلدیردی.
قید ائتمک لازیمدیر کی، بیرینجی بؤلومون دانیشانلاریندان مهندس علیرضا صرافی گریپ سالقینیندان و ایکینجی بؤلومون دانیشانلاریندان دوکتور فرمان فرضی شخصی سورونلاریندان دولایی مراسیمده اشتراک ائده بیلمه‌سه‌لر ده، بیوگرافی‌لری آپاریجی طرفیندن اوخونولدو. مراسیمین آپاریجی‌سی شادی خانیم مرزی ایدی.
بو اؤزه‌ل سایی‌نین تقدیمات مراسیمی خویلو یازیچی رقیه خانیم کبیری ایله ائل‌گوجو کمپی‌نین قوروجولارینین امکداشلیغی و «یارپاق جمعیتی»نین معنوی دستکی ایله حیاتا کئچیریلدی.
درگی‌نی آلماق ایسته‌ینلر بو ایمیل tabrizlikadin@gmail.com واسیطه‌سی ایله و یا رقیه خانیم کبیری‌نین سوسیال شبکه‌لرده حسابلاریندان سفارش وئره بیلرلر.
۱۴۰۳.۱۲.۱۱
