تهرانین «دنا» گالریسینده دی آیی‌نین ۱۳ و ۱۴-جی گونلری کئچیریلن «آرازین ساحیل‌لریندن» کیتابی‌نین تقدیماتی و «حبیب فرشباف»ین فوتو سرگیسی ماراقلی‌لار طرفیندن گئنیش قارشیلاندیغی سببیله ایکی هفته مدتینده اوزادیلمیشدیر. ماراقلی شخصلر بو تدبیردن دی آیی‌نین ۲۸-جی گونونه کیمی هر گون ساعت ۱۶دان ۲۱-قده‌ر فایدالانا بیلرلر. گالری هفته‌نین شنبه و یکشنبه گونلری تعطیل‌دیر.
تدبیرین تشکیلاتچیسی و کیتابین رئداکتورو «روشن نوروزی» جنابلاری تدبیر حاقیندا بئله معلومات وئردی: «بو مراسیمده حبیب فرشباف‌ین ۱۳۴۰-جی ایللرده آذربایجان کندلرینده چکدیگی فوتو شکیل‌لری‌نین بیر تعدادی نوماییش اولونا‌جاق. بونونلا یاناشی، معلم و فوتوقراف حبیب فرشباف‌ین فوتوشکیل‌لر و قئیدلرینی اؤزونده بیرلشدیرن «آرازین ساحیل‌لریندن» کیتابی دا ساتیشدا اولاجاقدیر.»
«روشن نوروزی» آرتیردی: «حبیب فرشباف ۱۳۴۲-جی ایلین تیر آییندا (یول ۱۹۶۳) تحصیلینی باشا ووردوقدان سونرا قاراداغ ماحالی‌نین اوجقار کندلرینه معلم کیمی تعیین ائدیلمیشدیر. او، قاراداغ کندلرینده معلم ایشلدیگی مدتده «لوبیتئل» کامئراسی ایله همین بؤلگه‌نین اینسان‌لارینین گونده‌لیک حیاتینی و طبیعتینی سندلشدیرمیشدیر. اینسان‌لارین چتین‌لیک‌لرینی و اونلارین موباریزه‌لرینی عکس ائتدیرن بو فوتوشکیل‌لر کیتاب حالیندا یاییملانمیش و سرگیده ده نوماییش اولونا‌جاقدیر.»
او علاوه ائتدی کی، «آرازین ساحیل‌لریندن» کیتابی «ایران تصویر» نشریاتی طرفیندن چاپ ائدیلمیشدیر. بو لایحه‌نین حاضیرلانماسی موختلیف متخصص‌لرین امکداشلیغی ایله حیاتا کئچیریلمیشدیر. لایحه‌نین مصلحتچیسی «پیمان هوشمندزاده»، اجرا‌چی مدیری «پریسا هاجری»، فوتو تنطیملییجیسی «مسعود حاج‌جعفری‌زاده»، فارسجا متن‌لرین ائدیتورو «کاوه اکبری» و انگیلیسجه متن‌لرین ائدیتورو و ترجومه‌چیسی «کیارش اقبالی» اولموشدور. کیتابین قرافیک دیزاینی و صحیفه‌لنمه‌سی ایسه «مصور» استودیاسی طرفیندن حاضیرلانمیشدیر. کیتاب ۱۲۰ صحیفه‌دن عبارت اولوب، حبیب فرشباف‌ین ۱۳۴۰-جی ایللرده (۱۹۶۰-جی ایللر) درس کئچدیگی کندلرین فوتوشکیل‌لری و قئیدلرینی فارس و انگلیس دیللرینده احتوا ائدیر. بوندان علاوه، کیتابدا پیمان هوشمندزاده، رضا معطریان، کیارنگ علایی، فرانک احمدزاده، افسانه کامران و محمد حب‌وطن طرفیندن یازیلمیش مقاله‌لر ده یئر آلیر.»
تدبیره بوتون ماراقلی شخصلر دعوت اولونور.
زمان: دی آیی‌نین ۱۵-جی گونوندن ۲۸-جی گونونه کیمی ساعت ۱۶:۰۰-دان ۲۱:۰۰-قده‌ر
مکان: تهران – خیابان سپهبد قرنی- بالاتر از خیابان طالقانی- کوچه سوسن- پلاک ۴- گالری دنا
بو تدبیردن بیر سیرا شکیل‌لری حؤرمتلی اوخوجولاریمیزا تقدیم ائدیریک. شکیل‌لر: سارا عبداللهی و بهاران نوروزی:
