تبریزلی شاعر اوستاد ناصر مرقاتی اوزون ایللر آغیر خسته‌لیکدن سونرا مهاجرتده(آلمانیادا) حیاتا گؤز یومدو.
آدی قالارقی شاعر ناصر مرقاتی ۱۳۲۸-جی ایل تبریزده حیاتا گؤز آچمیشدی. او دونیایا گلرکن هله‌ده وطنین فیرتینالی گونلری باشا چاتمامیشدی. تبریزین سماسیندا هله‌ده آنا دیلینده کیتابلار یانماسیندان، مین‌لر شهیدین آل قانیندان، مین‌لر مهاجرین کؤچگون دوشمه‌سیندن و مین‌لر محبوسون آزادلیق نیداسیندان ایز و اثر وار ایدی. مرقاتی‌نین اوشاقلیغی پهلوی حاکمیتی‌نین استبدادیندا و ۲۸مرداد کودتاسی‌نین قانلی قادالی گونلرینده کئچدی.
ناصر مرقاتی ۱۳۴۷-۴۸ ایللرینده، تبریز شهرینده دیپلم آلیب، ۱۳۴۹-جو ایلده، اؤلکه‌ده چریکی مبارزه‌لر باش قالدیران زمان، دانشگاهدان قبول اولدو و ائله همان ایلده ده ساواکین طرفیندن توتوقلاندی.
ناصر مرقاتی‌نین «تالانمیش گونش» شعر مجموعه‌سی ۱۳۷۷-جی ایلده ایشیق اوزو گؤردو. دئمک ناصر معللیم بیزیم مدرن و چاغداش شعریمیزین ایلک باشلایانلاریندادیر.
ناصر مرقاتی انقلابدان سونرا مهاجرت مجبوریتینده قالدی. مهاجرتده اونون ایچینده داها آرتیق میللی ترپنیش و میللی اویانیش اوستونلوک تاپدی. او، عؤمرونون سون گونلرینی آغیرخسته‌لیگینه باخمادان، دیل مسئله‌لری ایله باغلی یازیلارا حصر ائتدی. بو یازیلاردان «شعر و سوروملولوق»، «هله‌لیک نیابتی دیل قورومو»، «در نقد طباطبایی» و سسلی اثرلری…. آد آپارماق اولار.
«ادبیات سئونلر» بو واخت‌سیز-وعده‌سیز آیریلیغی، مرقاتی عایله‌سینه، اوستادین قلمداشلارینا و سئونلرینه باش‌ساغلیغی وئریر.
«ادبیات سئونلر» گروهو
۲۵/۹/۱۴۰۳
