ایشیق سایتینا چاتان خبر اساسیندا، چوخ تاسفله گؤرکملی آذربایجان شاعری «ناصر مرقاتی» ایکی گون بوندان اول(۲۳ آذر) یاشادیغی آلمانیانین برلین شهرینده اوزون سورن بیر خسته‌لیک سببیندن ۷۵ یاشیندا وفات ائتمیشدیر.
ناصر مرقاتی ۱۳۲۸نجی ایل تیر آیی‌نین ۱۶سیندا تبریز شهرینده آنادان اولموش، اوشاقلیعینی ماکی، سقز و قوشاچای‌دا کئچیرسه‌ده، ابتدایی و اورتا تحصیلاتینی تبریزده باشا ووروب، ۱۳۴۸نجی ایل دیپلم آلیر و بیر ایل سونرا دانیشگاها کئچیر. بو ایل‌لرین اؤلکه‌ده‌کی سیاسی اجتماعی آتموسفورو گنج شاعری رادیکال سیاسی فعالیتلره جلب ائدیر. کئچمیش شوروی آذربایجانیندان ایرانا گتیریلن ادبی ژورنال و غزئت‌لرین تاثیری آلتیندا اؤز یاردادیجیلیق یولونو سربست شعر ژانریندا و داها آرتیق آذربایجانین انقلابچی شاعری علیرضا نابدل(اوختای)ین ادبی سیاسی شخصیتی تاثیرینده داوام ائدیر. بو فعالیتی چوخ چکمیر؛ شاهلیق رژیمی علیهینه اجتماعی سیاسی فعالیتی سببیندن ۱۳۴۹نجی ایل ساواکین مختلف تضییق‌لرینه معروض قالیر و قیسا بیر مدت حبسه آلینیر. همن ایل بیر دوستو یانیندا امانت قویموش بوتون شعرلری او دوستون واسطه‌سیله آرادان آپاریلیر.
ناصر مرقاتی انقلابدان بیر نئچه ایل سونرا یئنی‌دن ادبی فعالیته باشلاییر، بیر چوخ شعرلر موللیفی کیمی محدود ادبی محفل‌لرده و اؤز دوستلاری آراسیندا اثرلرینی یایماغا باشلاییر و همن اثرلرین بیر سیراسینی ۱۳۷۷نجی ایل «تالانمیش گونش» باشلیغی آلتیندا «اندیشه نو» انتشاراتی طرفیندن ۷۲ صحیفه‌ده نشر ائتدیریر.
ناصر مرقاتی انقلابدان سونرا دا اجتماعی و سیاسی سیخینتیلارا معروض قالیر و وطندن کؤچمک مجبوریتینده قالاراق، نهایت آلمانیانین برلین شهرینده مسکونلاشیر و آذر آیی‌نین ۲۳نجی گونو همن شهرده ده عؤمور گونشی ابدیلیک سؤنور.
ایشیق- آذربایجان ادبیات و اینجه صنعت سایتی- امکداشلاری آدیندن تانینمیش آذربایجان شاعری «ناصر مرقاتی»نین وفاتینی اونون حؤرمتلی عائله عضولرینه، یولداشلارینا، آذربایجان ادبی اجتماعیاتینا و «ناصر مرقاتی» شعرینی سئون بوتون ادبیات هوسکارلارینا باش ساغلیغی وئریر، «تالانمیش گونش» شاعری‌نین خاطیره‌سینی عزیزله‌ییریک.
ایشیق- آذربایجان ادبیات و اینجه صنعت سایتی
۲۵ آذر ۱۴۰۳
