چوخ تاسفله سئویملی یولداشیمیز، آزادلیق‌سئور، عدالت‌پرور و فداکار معلم «خلیل قیاسی اردلان» بوگون آذر آیی‌نین ۱۷سینده آغ جییار خسته‌لییی سببیندن ۷۰ یاشیندایکن یاشادیغی تهران شهرینده سیرامیزی ترک ائدیب، ابدیته قووشدو.
وطن ائولادلارینی معاریفلندیرمک و تربیه ائتمک یولوندا عؤمرونو صرف ائدن سارابلی «خلیل قیاسی اردلان» فداکارلیق و تعهد رمزی ایدی. او، یالنیز علم اؤیرتمکله کیفایتلنمیردی؛ هم ده شاگیردلرینه اینسانی و اخلاقی ده‌یرلری آشیلاییب، اؤز فداکار خیدمت‌لری ایله اونلارا وطنپرورلیک، صولح‌سئورلیک و عدالت‌طلبلیک یولونو دا گؤسترمگه چالیشیر و بو یولدا درین ایزلر بوراخمیشدیر.
سئویملی یولداشیمیز «خلیل قیاسی» هم‌ده آذربایجان ادبیاتی و مدنیتی‌نین فداکار مدافعه‌چیسی، آنا دیللی مطبوعاتیمیزین صمیمی حامیسی و آذربایجان ادبی مدنی درنک‌لری‌نین هر زامان دایاغی اولان شریف بیر اینسان ایدی. اونون ادبی درنک‌لره و مدنی فعالیت‌لره وئردییی دستک و معنوی زنگین‌لییی اوزون ایللر بویونجا خاطیره‌لرده یاشایا‌جاق‌دیر.
«ایشیق» – آذربایجان ادبیات و اینجه صنعت سایتی- امکداشلاری آدیندان سئویملی اینسان، فداکار معلم و مدنیتیمیزین مدافعه‌چیسی «خلیل قیاسی اردلان» یولداشیمیزین آغیر ایتگیسینی حؤرمتلی عائله‌سینه، عزیز شاگیردلرینه، اؤلکه‌میزین معاریف و مدنیت اجتماعیاتینا، «ساهر ادبی مدنی درنه‌یی»نین اداره هئیتی و عضولرینه و «آذری مجله‌سی»نین مدیرلری و امکداشلارینا اوره‌کدن باش‌ساغلیغی وئریر، شرفلی خاطیره‌سینی عزیزله‌ییریک.
«ایشیق» – آذربایجان ادبیات و اینجه صنعت سایتی
۱۷ آذر ۱۴۰۳
