تانینمیش آذربایجان یازیچی و ژورنالیستی دوکتور مرتضی مجدفر تعلیم و تربیه اوزره یاراتدیغی علمی تدقیقاتی اثرلری و اوزون ایللر معارفلندیریجی فعالیتلرینه گؤره تجلیل اولدو.
آبان آیی‌نین ۲۲نجی گونو تهرانین «امید مدنیت سارایی»ندا اون‌لار نفر علمی، تعلیم تربیه و ادبی شخصیتلرین اشتراکی ایله دوکتور «مرتضی مجدفر»ین تعلیم و تربیه اوزره یاراتدیغی علمی تدقیقات و معارفلندیریجی فعالیتلریندن سؤز آچیلیب، بو ساحه‌ده‌کی خیدمتلری ده‌یرلندیریلدی.
عزیزلمه تدبیرینده تعلیم تربیه و ژورنالیسم اوزره دوشونجه صاحیبلریندن: دوکتورلار محمود امانی، ابوالفضل باقری، حیدر تورانی، حسن نمکدوست، محسن ابطحی، حمید دهقان، ائلدار صدیق، ابراهیم اصلانی و خانم دوکتورلر: اربابیان و دلاور، دوکتور مرتضی مجدفرین علمی شخصیتی، ژورنالیسم فعالیتی و ادبی سیماسی حاقیندا تدبیر اشتراکچیلارینا اؤز فیکیرلرینی سؤیله‌دیلر. بو تدبیرده تانینمیش آذربایجان شاعری و اجتماعی شخصیتی اوستاد حبیب فرشباف‌ین دوستو دوکتور مجدفر حاقیندا تدبیره گؤندردیگی یادداشتی شاعر بابک احمدی‌نین واسیطه‌سیله اشتراکچیلارا اوخوندو.
تدبیرین سونوندا دوکتور مجدفر، اشتراکچیلارا اؤز تشکرلرینی بیلدیره‌رک، ژورنالیسم اوستادی تانینمیش تورکولوژیست حسین محمدزاده صدیق (دوزگون) و شاعر – ژورنالیست دوستو حسن ریاضی (ایلدیریم)لا باغلی خاطیره‌لرینی سؤیله‌یرک، اؤز حیات یولداشینا اونون یارادیجیلیغینا دایر یاراتدیغی مساعد شراییط و حمایتی اوچون اؤزل تشکر و منتدارلیغینی بیلدیردی.
تدبیرده همچنین جناب اسفندیار پیفونون رهبرلیگی‌ایله آذربایجان موسیقی نمونه‌لری ایفا اولور و مجلیس اشتراکچیلاری طرفیندن آلقیشلارلا قارشیلاندی.
تدبیر «نامه صدیق» و «شوق تغییر» درگی‌لری و بیر سیرا دیگر درنک‌لرین تشبثی ایله حیاتا کئچمیشدیر.
«ایشیق» امکداشلاری آدیندان حؤرمتلی دوکتور مرتضی مجدفری تبریک ائدیر و اونا داهادا یارادیجیلیق اوغورلاری آرزولایاراق، همن تدبیردن بیر نئچه شکیلی عزیز اوخوجولاریمیزا تقدیم ائدیریک:
