ازلدن بئله‌دیر چونکی کاینات
جهان دایمی‌دیر، عؤمور امانات
الدن- اله کئچیر وفاسیز حیات
بیز گلدی گئدریک سن یاشا دونیا
آلدیغیمیز آجی خبر اساسیندا «ادبیات سئونلر قوروپو»نون تانینمیش اؤیه‌سی یاساق‌لاری سیندیران «یاساق‌لار قیزی» معصومه جبارپور بو گون تبریزده قلبی «آنفارکتوس» اثرینده آرزی کروانی مقصد چاتمادان، قلمی‌نین چیچکلی وعده‌سینده حیاتا گؤز یومدو.
بو اینانیلماز، آجی، دردلی خبر بیزیم هامیمیزی یاندیردی.
ادبیات سئونلر بو آیریلیغی ایلک اؤنجه جبارپور عایله‌لرینه، سئون‌لرینه، شاعرین قلمداش‌لارینا، قوروپداش‌لارینا و آذربایجان خالقینا باش ساغلیغی وئریر.
معصومه جبارپور ۱۳۶۸-جی ایلی فروردین آیی‌نین بئشینده تبریزه دونیایا گؤز آچمیشدی.
یاساق‌لار قیزی حیاتی‌نین ان گنج گون‌لریندن ادبیاتا ماراق گؤستردی. اونون حکایه‌لری، جسارتلی شعرلری مختلف درگی‌لرده، گونده‌لیک‌لرده، ادبیات سئونلر قوروپوندا، کانالیندا، ایشیق سایتیندا دفعه‌لرله نشر اولونوب.
یاساق‌لار قیزی‌نین ایلک کیتابی «قار آدام» عنوانی ایله ۱۳۹۵ده یاشار قلم انتشاراتی طرفیندن باسیلمیشدی. شاعرین ایکینجی اثری «من یاساق‌لاری سیندیردیم» ۱۳۹۶-جی ایلده آیدین ساو نشریاتی طرفیندن ایشیق اوزو گؤرموشدو. ادبیاتدان باشقا خانیم جبارپورون عمیدی جناب‌لاریله بیرلیکده بیر ترجمه‌سی ده «متابولیسم سلول سرتولی، متابولیسم اسپرم‌سازی» عنوانی ایله ۱۳۹۷ده انتشارات خسروی طرفیندن ائلمیزه یادیگار قالیب.
آدی قالارقی، اونودولماز شاعر معصومه جبارپورون توپراغا تاپیشیرما مراسیمی دوشنبه گونو ساعات ۱۲/۳۰ تبریزین وادی رحمت مزارلیغیندا قید اولاجاق.
ائلیمیزین سئویملی قیزی‌نین شام غریبانی دوشنبه گونو (۲۱/۰۸/۱۴۰۳) ساعات ۱۸:۳۰دان ۳۰/۲۰دک تبریزده مسجدالنبی ده(خیابان آخونی روبروی پامچال) قید اولاجاق.
عزیز شاعرین روحو شاد، توپراغی یونگول اولسون.
ادبیات سئونلر ۲۰/۰۸/۱۴۰۳
