چوخ تاسفله، آلدیغیمیز خبر اساسیندا تبریز ادبی محیطی‌نین تانینمیش شاعری معصوم‌خانیم جبارپور اوره‌ک اینفارکتی سببیندن بوگون آبان آیی‌نین ۲۰نجی گونو یاشادیغی تبریز شهرینده گؤزلنیلمه‌دن حیاتلا وداعلاشمیشدیر.
1368نجی ایل تبریزده دوغولان معصوم‌خانیم جبارپور فارس ادبیاتیندان آذربایجان تورکجه‌سینه اوز گتیرن شاعرلریمیزدن‌ایدی. ایلک شعرلری داها آرتیق فارس دیلینده اولماغینا رغما، ۱۳۹۵نجی ایل «قار آدام» و ۱۳۹۶نجی ایل «من یاساقلاری سیندیردیم» عنوانلی ایکی شعر توپلوسونو آذربایجان ادبی جمعیتینه تقدیم ائتمیشدیر. او عصیان شعرلری ایله آذربایجان ادبی اجتماعیاتیندا اؤزونه مخصوص مؤوقع قازانان و اؤزو دئمیشکن شعرده «یاساقلاری سیندیران» و جسارتله کیشی محور عنعنه‌نین سرحدلرینی پوزان بیر شاعر ایدی.
«ایشیق»- آذربایجان ادبیات و اینجه‌صنعت سایتی و «ایشیق درگیسی» امکداشلاری آدیندان معصوم‌خانیم جبارپورون تاسفلی ایتگیسینی اونون حؤرمتلی عائله‌سینه، دوست- تانیشلارینا و آذربایجان ادبی اجتماعیاتینا باش ساغلیغی وئریر، خاطیره‌سینی عزیزله‌ییریک.
«ایشیق»- آذربایجان ادبیات و اینجه‌صنعت سایتی
۲۰ آبان ۴۰۳
یک پاسخ
آزربایجان ادبیاتچیلارینین باشی ساغ اولسون.