احد فرهمندی (ادبی خبر و گزارش)
۱۴۰۳,۷,۱۱تاریخینده ناهاردان سونرا ساعت ۵-۸ آراسیندا، تبریزده تانینمیش شاعیر اوستاد محمد علی نهاوندی«موغان»ین ۷۸ ایللیگی قید اولوندو. بو تورن «کؤنولداشلار درنگی»، «ادبیات سئونلر عایله‌سی» و اوستادین عایله‌سی طرفیندن چوخ طنطنه‌لی و اونودولماز حالدا کئچیریلدی.
مراسیم اوستاد موغانین شعر دیکلمه‌سیله باشلاندی، آردیجا نادر پاشایی (پاشا)نین ایفاسیندا گؤزل بیر ساز چالیندی، مجید تیموری‌فر (صفا) معلیم قارمانینی جان‌سیغاللایان بیر هوایی ایله سسلندیردی. سولدوزدان گلن تانینمیش شاعر و یازار محرم پریزاد (سورگون) معلم، اوستاد موغانین قیرخ‌ایللیک ادبی و عایله وی دوستو، تورنین ایلک دانیشانی اولدو. صفا معلم، اوستاد موغانا یازدیغی شعری گؤزل سس و جانا سینر لحن ایله دیکلمه ائتدیلر. آذربایجان مدنیت اوجاغی‌نین حسن آذربایجاندان سونرا باشچیسی اولان مهندس یعقوب تقوی (توغان) جنابلاری اوستاد موغانلا اللی‌ایلیک دوستلوغوندان سؤز آچیب، دانیشیغینی ۲۱ کلمه‌‌لی «پاییز» شعری ایله بیتیردی. تبریزین تانینمیش ژورنالیست و تاریخچیسی اوستاد قاسم تورکان دگرلی سؤزلری ایله اوستاد موغانی عزیزله‌دیلر.
تبریزده بوللو موسیقی اؤیرنجیسینی بئجردیب هنر دونیاسینا داخل ائدن«احمد حضرتی»، باغلاما سازینی دینلندیرکن ایکی گؤزل استانبول شارکیسی اوخودو. کونولداشلار درنگی‌نین عضوی و تبریز یونیورسیته‌سی‌نین علمی هیئتینین عضوی اولان دکتر«حسین کوشاور (یاغیش)» جنابلاری، اوستاد موغانا یازدیغی شعرینی دیکلمه ائتدیلر. کونولداشلار درنگی‌نین دیگر عضوی، تبریز یونیورسیته‌سی‌نین علمی هیئتینین اویه سی هابئله تبریز یونیورسیته‌سینده حکیم‌لر موزه‌سی‌نین قوروجوسو اولان دکتر غلامعلی حاجیلو، اوستاد موغان اوچون یازدیغی بیر متنی قرائت ائتدیلر.
سونرا کونولداشلار درنگی‌نین تانینمیش اویه‌سی، تبریز یونیورسیته‌سی‌نین علمی هیئتینین عضوی هابئله تبریز یونیورسیته‌سینده کارشناسی مقطعینده کئچیریلن تورکو کلاسلارینین اوستادی، دکتر سیامک حسینعلی‌زاده (ارگین افشار) جنابلاری اوستاد موغانلا ایلک گؤروشولریندن خاطره‌لر تعریفله‌ییب، سونودا موغان اوچون فی‌البداهه بیر شعر اوخودو.
ارگین بی دن سونرا آذربایجانین تانینمیش یازار و شاعری، ۵۰دن آرتیق کتابین مؤلفی اوستاد صمد چایلی، موغان اوچون یازدیغی سربست بیر شعر دیکلمه ائتدی. رحمتلیک عاشیق مشی‌نین اوغلو، ادبیات اوزمانی نادر پاشائی (پاشا) جنابلاری «سئوینیرم یاشاییرام» شعر توپلوسو کتابیندان، اوستاد موغانا حصرائتدیی شعری قرائت ائتدیلر.
احمد حضرتی بیر داها سازینی دینلدیریب بیر گؤزل آذربایجان ماهنیسی اوخودو. خوش‌خبر گونده‌لیگی‌نین سوروملو مدیری کریم دلاویز جنابلاری دگرلی سؤزلری ایله اوستاد موغانی عزیزله‌دیلر. ادبیات‌سئورلر قروپونون قوروجوسو، صابر درنگی و ایشیق سایتی هابئله ادبیات‌سئونلر عایله‌سی طرفیندن اوستا موغانین آدی گونونو عزیزله‌ین کریم قربانزاده جنابلاری، آلقیشا لایق بیر چیخیشلا اوستاد موغانی عزیزله‌دیلر. اوستاد موغانین اسکی دوستلاریندان اولان حیدر نوروززاده جنابلاری اوستاد موغانا خطاب بیر شعر قرائت ائتدیلر. اوستاد موغاین اسکی دوستلاریندان اولان صوفیانلی رحیم گؤزل‌ین، موغانا حصر ائتدیگی شعری مجلیسین آپاریجیسی (احدفرهمندی) طرفیندن دیکلمه ائدیلدی. تبریزین موغام اوستادلاریندان اولان محمد‌حسین قیطانچی اوستاد صفانین (قارماندا) و احمد حضرتی‌نین (باغلاما سازیندا) مشایعتی ایله شوردا اوره‌ک اوخشایان بیر موغام و تصنیف اوخودولار. تبریزین شاه‌گولوسونوده هفته‌ده بیر دؤنه قورولان معلم امکچیلرینین ادبی درنگی‌نین آپاریجیسی محمد حضرتی جنابلاری، رحمتلیک اوستاد بارزین «یاسلی ساوالان» شعرینی و زلیمخان یعقوب‌دان ایکی گؤزل شعری دیکلمه ائتدیلر. مجلیسین دوامیندا کؤنولداشلار درنگی‌نین عضوی فریدون فضائلی جنابلاری، موغانین دوغوم گونو اوچون فارسجا بیر ادبی قطعه قرائت ائتدیلر. بئلهلیکله نوبت کونولداشلار درنگی‌نین دیگرعضوی و ایلخیچی فولکلورونو قلمه آلان «اسفندیار آوگان» جنابلارینا چاتدی، اسفندیار بی آنا دیل آدلی «توفیق بایرام»دان دگرلی بیر شعر اوخویوب اوستاد موغانا تقدیم ائله‌دیرلر ، ادبیات سئونلر عایلهسینین تانینمیش اویه‌سی، ذکیه‌خانم ذولفقاری اوستاد موغانین دوغوم گونونو تبریک دئییب، گؤزل سؤزلریله اوستادی عزیزله‌دیلر.
مجلیسین سونوندا اوستادین حیات یولداشی رقیه‌خانم ثریایی قوناقلارا خوش‌گلدین دئییب، اوستادا جان‌ساغلیغی و اوزون عؤمور دیله‌دیلر. تبریزین اسلامی آزاد دانشگاهی‌نین علمی هیئتینین عضوی اولان دکتر ناعمه نهاوندی، اوستاد موغانین کیچیک قیزی، فارسجا یازدیغی ایکی شعرینی اوستاد موغانین تورکجه ترجمه‌سی ایله اوخودو.
اوستاد سورگونون اوغلو «مهرداد پریزاد» ان کیچیک یاشلاریندان اوستاد موغانی تانیدیغی اوچون اوستادی عمی خطاب ائدیب، اونا جان‌ساغلیغی و اوزون عؤمور دیله‌دیلر. «مهدی نهاوندی» اوستاد موغانین اوغلو دا هامییا خوش گلدین دئییب آتاسینا جان‌ساغلیغی آرزولادی.
مجلسین سون حیصه‌سینده اوستاد موغانین بؤیوک قیزی «مهدیه خانیم نهاوندی» پیشیردیکلری دادلی بیر کیکی اوستادین الی ایله کسیلیب قوناقلارا پایلادیلار. بوگؤزل تورن یاردگار شکیل‌لرین چکیلیشی ایله سونا چاتدی.
بئلهلیکله اوستاد موغانا جان ساغلیغی آرزویلاییب، اومود ائدیریک اوستادین ۸۸ ایللیگینی و داها سونرا ۹۹ ایللیگی شنلیکله کئچیردک.
قیدلر:
1- بو توره‌نین بوتون چیخیشلاری اوستاد کریم قربانزاده طرفیندن فیلمه چکیلدی.
2- توره‌نین آپاریجیسی، کؤنولداشلار درنگی‌نین قوروجولاریندان بیری و ادبیات‌سئونلر عایلهسینین عضولریندن اولان احد فرهمندی ایدی.
3- توره‌نین گزارشینی یازان: احد فرهمندی
منبع:
https://t.me/Adabiyyatsevanlar
