تحصیل ایلی‌نین باشلانماسی ایله «ادبیات سئونلر» گروهو طرفیندن «خوی» ماحالی‌نین «قیرخ یاشار» کندینده تیکیلن مدرسه استفاده‌یه وئریلدی.
کئچن ایل پاییز و قیش فصیللرینده آردیجیل زلزله‌لر سببیندن اوچوب داغیلمیش «قیرخ یاشار» کندینین مدرسه‌سی، «ادبیات سئونلر» گروهونون باشچیلیغی ایله استانداردلارا اویغون اؤلچولرله یئنی‌دن تیکیلمیش و مهر آیی‌نین ۱۲نجی گونو اونون آچیلیش مراسیمی کئچیریلمیشدیر.
مدرسه‌نین آچیلیش مراسیمینده «ادبیات سئونلر» گروهونون باشچیسی جناب کریم قربانزاده، گروهون عضولریندن مرجان خانیم منافزاده، زکیه خانیم ذلفقاری، رسول اسمعیلیان، جعفر فروزان، حسین طالب و آذربایجانین گؤرکملی تدقیقاتچی و ترجمه‌چیسی اوستاد رحیم رئیس‌نیا و بیر سیرا دیگر اجتماعی شخصیتلر اشتراک ائتمیشلر.
اوستاد رحیم رئیس‌نیا «تبریز» مدرسه‌سینین آچیلیشیندا شاگیردلره خطاب بئله سؤیله‌میشدیر:
«من سیزلری کی گؤردوم یادیما دوشدو او گون کی اول گون گئدیردیم مدرسه‌یه. تبریز شهرینده او مدرسه‌نین کی بیز گئدیردیک کؤهنه بیر ساختمانی واریدی، آمما گؤزل- گؤزل معلیملری واریدی. ائله سیزین کیمی اول کلاسدان تا دؤردونجو کیلاساجان اوغلان، قیز قاریشیق ایدی. او زامان بیزیم او ساختمان کی اوردا اوخویوردوق کؤهنلمیش بیر ساختمان ایدی. ایندی من گلدیم گؤرورم کی سیزین بو گؤزللیکده، تمیز مدرسه‌ز وار و هامیز اوتوموسوز قشنگ یان یانا. امیدوارام کی…. اونو دا من بیلیرم کی تمام او بؤیوک اینسانلار هامیسی بو نیمکت‌لرین، بو تخت‌لرین دالیسیندان دوروبلار. بوردا قشنگ اوخویاسیز. بورانین فضاسیندان یاخچی استفاده ائلییه‌سیز و ائله کی انشالله یوخاری درجه‌لره یئتیشدیز، هم کندده اؤز هم کندلریزه، بطور کلی هر یئرده هموطنلریزه {خدمت ائلییه‌سیز}. من بیلیرم کی سیزلرین ایچیندن چوخ- چوخ، بؤیوک- بؤیوک اینسانلار چیخاجاق؛ دوکتورلر چیخاجاق؛ اوستادلار چیخاجاق. حتما اوجوردو، یعنی مطمئنم. و خوشا کی بو گؤزللیکده، بو تمیزلیکده مدرسه ده درس اوخویورسوز. سیزه هامیزا موفقیت آرزو ائلییرم. ساغ اولون سیزی. یاشییاسیز.»
مراسیمده، مدرسه‌نین تیکیلیشینده امه‌یی کئچن شخصلره «ادبیات سئونلر» گروهو آدیندان تشکر لوحه‌لری و مدرسه‌نین شاگیردلرینه ایسه هدیه‌لر تقدیم ائدیلمیشدیر.(خبرین سونو)
***
«ایشیق» – آذربایجان ادبیات و اینجه صنعت سایتی امکداشلاری آدیندان، حؤرمتلی قلمداشلاریمیزا و قارداش «ادبیات سئونلر» گروهونون اداره هئیتی و عضولرینه، ائله‌جه ده بو گؤزل ایشین سرانجاما یئتیشمه‌سینده اللریندن گلنی اسیرگمه‌ین اینسانلارا – «یورولمایاسینیز!» دئییر و اونلارا اجتماعی خیرخواه ایشلرینده داهادا اوغورلار آرزولاییریق.
