یاییلان خبرلر اساسیندا آذربایجان جمهوریسینده یاشایان مرندلی یازیچی، ژورنالیست و تاریخچی «اکرم رحیملی» وفات ائتمیشدیر.
اکرم رحیملی ۱۳۱۱نجی ایل کازاخ شهرینده ایران آذربایجانی‌نین یوخاری دیزه کندیندن اوتایا مهاجرت ائدن مرندلی بیر عائله‌‌ده دونیایا گؤز آچمیش، بئش یاشینداایکن عائله‌سیله بیرلیکده ایرانا قاییتمیشدیر. ابتدایی تحصیلاتینی مرندین یوخاری دیزه کندینده بیتیرمیش، ۲۱ آذر نهضتی شکسته اوغرادیقدان سونرا یئنی‌دن عائله‌سیله بیرلیکده آذربایجانا کؤچموش، گنجه و باکی شهرلرینده ادبیات و تاریخ اختصاصلاریندا تحصیلینه داوام وئرمیش و ۱۳۳۶نجی ایل لیسانس آلمیش و بیر معلم و ژورنالیست کیمی ایشه باشلامیشدیر.
اکرم رحیملی اؤز تحصیلی‌نین داوامیندا ۱۳۴۲نجی ایل آذربایجان علملر آکادئمیاسی‌نین شرقشناسلیق شعبه‌سیندن یوکسک لیسانس سویه‌سینده علمی درجه آلمیش و ضیا بنیادف آدینا شرقشناسلیق اینیستوتوندا علمی ایشه باشلامیشدیر.
اکرم رحیملی اردیبهشت آیی‌نین ۹نجی گونو باکی شهرینده ۹۰ یاشیندا آهیللیق سببیندن وفات ائتمیشدیر.
«ایشیق سایتی» امکداشلاری آدیندان تانینمیش آذربایجان عالم و تاریخچیسی «اکرم رحیملی»‌نین ایتگیسینی اونون حؤرمتلی عائله سینه، دوست و تانیشلارینا تسلیت دئییر و خاطره سینی عزیزله‌ییریک.