چوخ تاسفله، یاییلان خبرلر اساسیندا، تانینمیش آذربایجانلی ناشر، «دنیا» نشریاتی‌نین مدیری «بیوک‌خان اروانی» حیاتدان ابدیلیک آیریلمیشدیر.
«بیوک‌خان اروانی»نین قیرخینجی ایللرین ایلک یاریسیندان آذربایجان مدنیتینه ائتدیگی خیدمتلری و مترقی ادبیاتین نشرینده یورولمادان چالیشماسی اونودولمازدیر. اونون تهرانداکی «دنیا» نشریاتی واسیطه‌سیله و قارداشی مجیدآقا اروانی‌نین تبریزده‌کی «نوبل» و «شمس» انتشاراتی واسیطه‌سیله حیاتا کئچیرتدیکلری مدنی – اجتماعی فعالیتلر آذربایجانین و ایرانین نشر و ترقی‌پرور ادبی اجتماعی نمونه‌لری‌نین یاییلما تاریخیندن سیلینمز پارلاق صحیفه‌لردیرلر.
«بیوک‌آقا اروانی» تبریزین تانینمیش و حؤرمتله آدی چکیلن تاجری حاج حبیب اروانی عائله‌سینده دونیایا گؤز آچمیش، تاجر بیر عائله‌ده بویا باشا چاتدیغینا رغما، قیرخینجی ایلدن قارداشی مجیدآقا ایله برابر آذربایجان ضیالی حرکاتینا وورولموش و صمد بهرنگی‌نین اثرلرینین نشری ایله نشر ایشینه باشلامیش، سونرالار گؤرکملی آذربایجان اجتماعی شخصیتی محمدعلی فرزانه‌ایله بیرلیکده تهراندا اؤز مدنی فعالیتینه داوام وئرمیشدیر.
تاسفله «بیوک‌آقا اروانی» اسفند آیی‌نین ایکیسینده حیاتا گؤز یومموش، جنازه‌سی ایسه سه‌شنبه گونو ۳/۱۲/۱۴۰۰ عائله عضولری و یاخین دوستلارینین مشایعتی ایله تهرانین بهشت‌زهرا مزارلیغینین ۳۴نجی قطعه‌سی‌نین ۷۹نجی ردیفی‌نین ۴۳نجی نومره‌سینده تورپاغا تاپشیریلمیشدیر.
«ایشیق» -آذربایجان ادبیات و اینجه صنعت سایتی- امکداشلاری آدیندان گؤرکملی ناشر و آذربایجانین تانینمیش اجتماعی شخصیتی «بیوک‌خان اروانی»نین ایتگیسینی حؤرمتلی عائله‌سینه و ادبی مدنی اجتماعیاتیمیزا باش ساغلیغی وئریر و شرفلی خاطیره‌سینی عزیزله‌ییریک.
«ایشیق» -آذربایجان ادبیات و اینجه صنعت سایتی
۳/۱۲/۱۴۰۰
یک پاسخ
سلاملار سایقیلار
حرمتلی بیوک آقا اروانی دونیاسین دییشدیگی خبری بیزی ده چوخ کدرلندیردی حرمتلی بیوک اقانین میلی وازربایجان ادبیات ودیل کولتورصاحسینده اپاردیقی زحمت لر هئچ زامان اونودلمازتانری رحمت ائلسین وعائله عضولرینه ودوستلارا باش ساغلیغی دیلیرام باشیوز ساغ اولسون.