یاییلان خبرلر اساسیندا، تاسفله کرج شهرینده یاشایان آذربایجانلی شاعر محمدرضا ملک‌پور(ناظر شرفخانه‌ای) خرچنگ خسته‌لیگی سببیندن شهریور آیی‌نین ۱۶نجی گونو حیاتلا وداعلاشمیش و ۸۳ یاشیندا وفات ائتمیشدیر.
ناظر شرفخانه‌ای کرج شهرینده یاشادیقدا آلتمیش و یئتمیشینجی ایللر تورک و فارس دیللرینده فعالیت ائده‌ن «فرخی یزدی» آدینا ادبی انجومنین اشتراکچیلاریندان اولموش، سونراکی ایللر «گونئی مدنیت اوجاغی» درنه‌یینده فعالجاسینا اشتراک ائتمیشدیر.
ناظر شرفخانه‌ای آذربایجان تورکجه‌سی و فارس دیللرینده اثرلرینی یاراتمیش، هجا و کلاسیک عروض وزنینده وطنپرورلیک، انسان‌سئورلیک و فلسفی موضوعلاردا بیر چوخ شعرلرین موللیفی‌دیر. حوزه‌وی و آکادمیک تحصیلی اولدوغو اوچون فارس و آذربایجان تورکجه‌سیندن علاوه عربجه ده یازیلاری و شعرلری اولوبدور. ایلک شعر مجموعه‌سی «اولدوزلو دنیز» باشلیغی آلتیندا ۱۳۷۲نجی ایل نشر ائدیلمیش، سونراکی ایللرده «شئهلی سحر»(۱۳۷۷)، «ماهنیلی چای»(۱۳۸۰)، «دیوان ترکی»(۱۳۸۳)، اوره‌ک چیرپینتیسی»(۱۳۸۸)، «سون ایستک‌لر»(۱۳۸۹)، «حیکایه‌لر، طنزلر و یئنی غزل‌لر»(۱۳۸۹)، «کلیات دیوان ترکی»(۱۳۹۳) و «ایپک چیچک‌لر»(۱۳۹۴) عنوانلاریندا شعر مجموعه‌لری ده یاییلمیشدیر. بو کیتابلاردان علاوه، فارسجا شعرلرینی احتوا ائده‌ن یئددی شعر مجموعه‌سی ده نشر ائدیلیبدیر.
ایشیق – آذربایجان ادبیات و اینجه صنعت سایتی امکداشلاری آدیندان تانینمیش آذربایجانلی شاعر محمدرضا ملک‌پور(ناظر شرفخانه‌ای)نین ایتگیسینی ادبی جمعیتیمیزه، حؤرمتلی عائله و دوست تانیشلارینا، ائله‌جه‌ده «گونئی مدنیت اوجاغی»نین اداره هیاتی و عضولرینه تسلیت دئییر و خاطیره‌سینی عزیزله‌ییریک.
ایشیق – آذربایجان ادبیات و اینجه صنعت سایتی
۱۶/۰۶/۱۴۰۰
