«حکیم ملا محمدعلی هیدجی»نین دیوانی یاییلدی

معاصر چاغیمیزین بؤیوک فیلسوف و شاعری «حکیم هیدجی‌نین» بوتون اثرلری بیر جیلدده ساوالان انتشاراتی طرفیندن یاییلدی.
حکیم هیدجی‌نین دؤرد کیتابینی احتیوا ائدن بو کیتابا فیلسوفون تورکجه شعر دیوانی، دیوان اشعار فارسی، مثنوی دانشنامه و رساله‌ی دخانیه‌دن عبارت اثرلری داخیلدیر. کیتاب جناب دکتر حسین محمدزاده صدیق طرفیندن تصحیح اولوب، مقدمه و تحشیه یازیلیبدیر. دکتر صدیق طرفیندن یوز صفحه‌یه یاخین یازیلمیش مقدمه‌ده شاعیرین حیاتی، شعر سبکی، تحصیلاتی، اثرلری، شاگیردلری و اونا یازیلان باخیشلارین اؤزتی، بؤیوک فیلسوفون نشر اولان کینابلاریندان و آذربایجان شعرینه بوراخدیغی تاثیریندن سؤز آچیلیبدیر. کیتابین سونوندا علاوه‌لر آدلی بؤلوم آرتیریلیب و نسخه فرقلری آچیقلانیب، اؤزل لغت‌لر و ترمین‌لر شرح وئریلیب، بوتون تورکجه دیواندا ایشله‌دیلن اصیل تورک سؤزلری آیریجا گتیریلیب، ادبی بزک‌لر آدیندا تشریح و هابئله دیواندا گئده‌ن آتالار سؤزلری و دئییم‌لری آراشدیریلیب و ایضاح اولونوبدور. سونرا عربی عباره‌لر و آیه‌لر ایضاح ائدیلیب، تورکجه-فارسجا چتین لغت‌لر تشریح اولوب‌ و سونوندا دقیق اعلام گتیریلیب و هابئله فلسفی-عرفانی اصطلاح‌لارین شرحی وئریلیب و نهایت شاعردن بو‌ گونه کیمی نشر اولان کیتابلارین فوتوسو و کتابنامه‌سی ایله اثر سونا چاتیبدیر.
بو کیتاب ۵۵۶ صحیفه‌ده یاشماق‌سیرا‌ کیتابلاری ایچینده سعید موغانلی طرفیندن نشره حاضیرلانیبدیر. کیتابی آلماق اوچون آشاغیداکی آدرسلرله علاقه ساخلاماق اولار:
تلگرام: @yashmaq
آنلاین ساتیش: @savalan_igidlary
@yashmaq_book
@evdeal.ir