آذربایجانلی آکتیور وفات ائتدی
«خبرآنلاین» آژانسینین یایدیغی معلوماتا گؤره آذربایجانلی سینما و تلویزیون آکتیورو «ابراهیم آبادی» بیر مدت آغ جییار خسته‌لیگی سببیندن خسته‌خانادا قالدیقدان سونرا آبان آیی‌نین ۹نجی گونو ۸۵ یاشیندا وفات ائتمیشدیر.
«ابراهیم آبادی» ۱۳۱۳نجی ایل تبریز شهرینین کوچه باغ محله‌سینده آنادان اولموش و تئاتر رژیسورلوغو تحصیلینی چکسلواکی‌نین پراگ شهرینده بیتیرمیشدیر. ابراهیم آبادی آکتیورلوق صنعتی ایله برابر آذربایجان دیلینده ده شعرلر موللیفی‌دیر.
ابراهیم آبادی بیر چوخ سینما و تلویزیون فیلم و سریاللاریندا بیر آکتیور کیمی اشتراک ائتمیش و اؤز یارادیجیلیغیندان دیرلی یادگارلار قویموشدور. ایراهیم آبادی‌نین سریاللاردان «پاورچین»، «طبقه متوسط»، «شب دهم»، «معصومیت از دست رفته» و «مختارنامه» و سینما فیلملریندن «مربای شیرین»، «توکیو بدون توقف»، «عطر کافور عطر یاس»، «صد سال به این سال‌ها» و «آپارتمان شماره ۱۳» فیلملرینی آد آپارماق اولار.
«ایشیق» – آذربایجان ادبیات و اینجه صنعت سایتی گؤرکملی صنعتکارین اؤلومونو صنعت جمعیتینه، حؤرمتلی عائیله‌سینه و دوست- تانیشلارینا تسلیت دئییر و مرحومون خاطره‌سینی عزیزله‌ییر.
«ایشیق» – آذربایجان ادبیات و اینجه صنعت سایتی
۰۹/۰۸/۱۳۹۸
