«اون بیر بوداقلی آغاج» کیتابی‌نین تقدیمات تؤره‌نی
قاراداغ ماحالی‌نین تانینمیش شاعری «سخاوت عزتی»نین امه‌یی ایله اون بیر گنج قاراداغ شاعیریندن حاضیرلانمیش شعر توپلوسونون تقدیمات تؤره‌نی کئچیریلدی. تبریز اختر یایین ائوینین یایین‌لادیغی۱۵۲ صحیفه‌لیک بو کیتابا شاعر سخاوت عزتی ایله برابر قاراداغین گنج شاعرلریندن صدیقه آتلوپور (گونش)، مریم بیرامی، ثاقب رشت‌آبادی، صیاد زیادپور، ابوالفضل محمدزاده، جلیل علیجانپور، محمدرضا محمودی، طاهر ایمانی، امیدعلی شیخی و علی طالبی’نین شعرلریندن نمونه‌لر داخیل ائدیلمیشدیر.
اهر شهرینین شیخ شهاب‌الدین اهری کیتابخاناسی‌نین آمفی تئاتر سالونوندا کئچیریلن بو تقدیماتا، آذربایجانین بیر چوخ شهرلریندن یازیچی، شاعر و ادبیات خادیملری ده قاتیلمیشدیر.
