«عاشیق حسین اسدی» ابدیته قووشدو
«ایشیق» – آذربایجان ادبیات و اینجه‌صنعت سایتی
چوخ تاسفله گؤرکملی آذربایجان صنعتکاری عاشیق حسین اسدی شهریور آیی‌نین ۱۳ده اوره‌ک انفاکتی سببیندن ۵۸ یاشیندا حیاتینی ایتیرمیش و ابدیته قووشموشدور.
اوزون ایللردن بری تهران شهرینده یاشایان عاشیق حسین اسدی، ایران آذربایجانیندا عاشیق صنعتیمیزین آغیر گونلرینین فداکار تبلیغچیسی اولموش و اؤز صنعتینی سئودیگی ائل- اوباسینین خوشبختلیگی، سئوینجی و گله‌جه‌یه نیک‌بین باخماغی اوغروندا چیچکلندیرمیشدیر.
عاشیق حسین اسدی یارادیجی صنعتکار اولموش، ساز صنعتی‌نین امکانلاریندان اولدوقجا فایدالانمیش و بو امکانلاری اؤز صنعتکار قابلیتی‌له گئنیشلندیریب و الده ائتدیگی نائلیتلری اؤز شاگرلرینه ده کئچیرتمیشدیر. بو گون خالقیمیزین فخر ائتدیگی دونیا شهرتلی اوستاد عاشیق چنگیز مهدی‌پور و بیر نئچه باشقا یارادیجی عاشیق و ساز ایفاچیلاری عاشیق حسین اسدی صنعتی بولاغیندان سو ایچنلردن اولموشدولار.
عاشیق حسین اسدی ایران انقلابیندان سونرا آذربایجان ساز صنعتینه یئنی آب و هوا گتیرن ایلک صنعتکارلاردان و بلکه ده بیرینجیسی اولموشدور.
عاشیق حسین اسدی سون ایللر ساز صنعتیله برابر آذربایجان تار ایفاچیسی کیمی‌ده چیخیش ائتمیش و عؤمرونون سون گونلرینه‌دک ایستر ساز و ایسترسه ده آذربایجان تاری‌نین ایفا امکانلاری اوزره یورولمازجاسینا یارادیجی ایش آپارمیش و اون‌لارجا شاگیرد تربیه ائتمیشدیر.
«ایشیق» – آذربایجان ادبیات و اینجه‌صنعت سایتی امکداشلاری، عاشیق حسین اسدی‌نین اؤلومونو عاشیق صنعتیمیزه آغیر بیر ایتگی حساب ائدیر و بو ایتگینی آذربایجان خالقینا، اونودولماز صنعتکاریمیزین حؤرمتلی عائیله‌سینه، قوهوم- اقرباسینا و بوتون آذربایجان ادبیات و اینجه صنعت درنک‌لری – خصوصیله خدافرین انجومنی- عضولرینه باشینیز ساغ اولسون! دئییر و اونودولماز صنعتکاریمیزین شرفلی خاطیره‌سینی عزیزله‌ییر.
«ایشیق» – آذربایجان ادبیات و اینجه‌صنعت سایتی
۱۳ شهریور ۱۳۹۵
***
مراسم تشیع جنازه و ختم استاد عاشق حسین اسدى:
تشییع جنازه: یکشنبه ۱۴ شهریور- صبح از درب منزل واقع در تهرانپارس – میدان رهبر- انتهاى خیابان طالقانى آخرین کوچه
خاکسپاری: یکشنبه ۱۴ شهریور- ساعت ۱۰ صبح- قطعه هنرمندان بهشت زهرا در تهران
مراسم ختم (مسجد): یکشنبه ۱۴ شهریور از ساعت ۱۷ الى ۱۹ در مسجد امام رضا واقع در: تهرانپارس- بلوار پروین- انتهاى خیابان ۱۹۶ – مابین خیابان ۱۳۵و ۱۳۷
