آذربایجانین خالق شاعری سهراب طاهر وفات ائتدی
یاییلان معلوماتا گؤره، آذربایجانین خالق شاعری سهراب طاهر بو گون اوزون سورن خسته‌لیکدن سونرا وفات ائتمیشدیر.
سهراب طاهر ۱۳۰۵-جی ایل ایرانین آستارا شهرینده صنعتکار عاییله‌سینده آنادان اولوب. “سعادت” و “شاهپور” مدرسه‌لرینده ۹-جو کلاسادک تحصیل آلیب، عاییله وضعیتی‌نین آغیرلیغی اوزوندن آتاسی ایله “ایران-انگلیس نفت شیرکتی”نده ایشله‌مه‌یه مجبور اولوب.
آذربایجاندا یارانان ۲۱ آذر حرکاتیندا فعال ایشتیراک ائدیب. ۱۳۲۵-جی ایلده باکی‌یا تحصیل آلماغا گؤندریلیب. ۱۹۵۰-جی ایلده باکی طب مکتبینده دیش حکیملیگی اوزره اختصاصلی تحصیل آلیب. او، ۱۹۵۲-۱۹۵۷-جی ایللرده آذربایجان دولت یونیورسیته‌سینده فیلولوگییا فاکولته‌سینده اوخویوب. ۱۹۵۹-۱۹۶۱-جی ایللرده موسکوادا ماکسیم قورکی آدینا عالی ادبیات کورسلارینی قورتاریب. ۱۹۶۲-۱۹۶۶-جی ایللرده آذربایحان دموکرات فیرقه‌سی‌نین باکی کومیته‌سینده بیرینجی کاتیب، “آذربایجان” قزئتی و ژورنالی رئداکسییالاریندا بدیعی شعبه‌لرده مودیر، “سحر” ادبی-تاریخی ژورنالیندا باش رئداکتور معاوینی، ۱۹۸۴-جو ایلدن “آذربایجان” ژورنالیندا رئداکتور اولوب.
آذربایجان یازیچیلار بیرلیگی اداره هئیتی نزدینده یاییلان ژورنالین رئداکسییا هئیتی‌نین، “یازیچی” نشریاتی‌نین بدیعی شوراسی‌نین، آذربایجان ادبیات فوندو اداره هئیتی‌نین عضوو، شوروی ادبیات فوندو پلئنومونون عضوو، آذربایجان یازیچیلار بیرلیگی شغر شوراسی‌نین صدری (۱۹۸۶-۱۹۹۱) اولموشدور. ۱۹۹۱-جی ایلده بدیعی ادبیاتی تبلیغات اداره هئیتی‌نین صدری تعیین ائدیلیب. انقلابی، ادبی-اجتماعی فعالیتینه گؤره تبریزده “۲۱ آذر” مئدالی ایله تلطیف اولونان سهراب طاهر، سووئت آذربایجانیندا دا بیر سیرا باشقا مئداللارلا تلطیف ائدیلمیشدیر.
۲۰۰۶-جی ایلده آذربایجان جومهوریسی باشچیسی‌نین سرانجامی ایله “شؤهرت” اوردئنینه لاییق گؤرولوب. ۲۰۱۰-جو ایلده روسیا یازیچیلار اتفاقی و اونون موسکوا شهر تشکیلاتی نزدینده فعالیت گؤسترن یازیچی-ترجومه‌چیلر اتفاقی‌نین قراری ایله بین‌الخالق مایاکوفسکی اوردئنی ایله تلطیف ائدیلیب.
خالق شاعری سهراب طاهر اوزون سورن خسته‌لیکدن سونرا اردیبهشت آیی‌نین ۱۵-جی گونونده باکی شهرینده وفات ائتمیشدیر.
اثرلری:
وطنله سئوگی آراسیندا (شعرلر و پوئمالار). باکی: یازیچی، ۱۹۸۶، ۳۴۴ ص.
قونشو قیزین مکتوبلاری (پووئست و رومان). باکی: گنجلیک، ۱۹۸۵، ۲۷۲ ص.
امانت (پووئستلر). باکی: گنجلیک، ۱۹۹۱، ۴۲۱ ص.
لیریکا. باکی: آذربایجان رئسپوبلیکاسی “کیتاب” جمعیتی، ۱۹۹۲، ۸۵ ص.
سئوگی افسانه‌سی (شعرلر و پوئمالار). باکی: یازیچی، ۱۹۸۳، ۲۸۴ ص.
خبرین منبعی www.qafqazinfo.az
یک پاسخ
آنامین الی / سهراب طاهر
آنامین اللری یادیما دوشوب ،
اؤپوب گؤزوم اوسته قویماق ایسته رم
ألینین کؤتَگی نئجه شیرین دیر ،
شیرین کؤتَگیندن دۆیماق ایسته رم …
حیرصله نیب او منی هردن دؤیَنده ،
یاشلی گؤزلرینی قیرپیب یوماردی ،
خیردا اللری نین تیتره ییشیندن،
نصحت تؤکولور، اؤیود داماردی … !
سلام. هله ده اؤز سسی ایله اوخودوغو شعرلری قولاغیمدا سسله‌نیر. آللاه رحمت ائله‌سین.