دونیا بیر بولاقدی، قاینار بیر بولاق
سو قالار، گؤزوندن ایچیب گئده‌رم
دونیا بیر کؤرپودو، طاغسیز- دایاقسیز
یئریییب اوستوندن کئچیب، گئده‌رم

زامان منه باخماز، چاغ منه قالماز
سولار چیچکلری، تاغ منه قالماز
الیمله سالدیغیم باغ منه قالماز
قوردوغوم یووادان اوچوب گئده‌رم

واختین پنجه‌سینده سویویان قیشام
اؤزو اؤز عؤمرونو شوملایان خیشام
ایستی بیر بئشیکده خومارلانمیشام
سویوق بیر تابوتدا کؤچوب گئده‌رم..

آذربایجان جومهوریسی‌نین تانینمیش اجتماعی ادبی شخصیتی، خالق شاعری زلیمخان یعقوب وفات ائتدی. یاییلان خبرلره اساسن، سون گونلر بیر نئچه ایل بؤیره‌ک چاتیشمامازلیغیندان اذیت چکن خالق شاعری‌نین ساغلیق دوروموندان جیددی پرابلئملر یارانمیش و معالجه هئچ بیر نتیجه وئرمه‌میشدیر. هفته‌ده اوچ دفعه دیالیز اولان شاعر نهایت حیاتلا وداعلاشمیش و جنازه‌سی‌نین باکی شهری‌نین فخری خیابانیندا تورپاغا تاپشیریلاجاغی نظرده توتولموشدور.
«زلیمخان یعقوب» ۱۹۵۰-جی ایل بورچالی‌ ماحالی‌نین کپنکچی کندینده آنادان اولوب، ۱۹۶۷-جی ایلده دوغولدوغو کندده اورتا مکتبی، ۱۹۷۲-جی ایلده ایسه آذربایجان دولت یونیوئرسیته‌تینین کیتابخاناچیلیق فاکولته‌سینی بیتیریب. ۱۹۷۳-جی ایلدن ۱۹۷۸-جی ایله قده‌ر «آذرکیتاب» سیستمینده «کیتاب پاساژی» آدلی کیتاب دوکانیندا ساتیجی، باش ساتیجی، شعبه مدیری، ۱۹۷۵-جی ایلدن ۱۹۸۵-جی ایله قده‌ر آذربایجان کؤنوللو کیتاب سئورلر جمعیتینده تبلیغات شعبه‌سینده ریداکتور، شعبه مدیری ، ۱۹۸۷-جی ایلدن ۱۹۹۴-جی ایله قده‌ر «یازیچی» نشریاتیندا پوئزیا شعبه‌سینده ریداکتور، شعبه مدیری وظیفه‌لرینده چالیشیب. ۱۹۹۵- ۲۰۰۵-جی ایللرده آذربایجان جومهوریسی‌نین میللی مجلیسی‌نین نوماینده‌سی اولوب.
«زلیمخان یعقوب»ون ایلک شعری ۱۹۶۶-جی ایلده یاییلمیش، یارادیجیلیق حیاتی بویو ۲۰دن آرتیق شعر کیتابی نشر ائدیلمیشدیر.