تهراندا یاشایان آذربایجان شاعرلری چیخیش ائتدیلر
تهراندا یاشایان آذربایجان شاعرلری «قار چبچک‌لری» الکترون گروهونون دعوتی‌له طنطنه‌لی شعر و موسیقی آخشامی کئچیرتدیلر. تهرانین «مشق مدنیت سارایی»ندا تشکیل ائدیلن بو ادبی مدنی مراسیمده ایکی یوز نفره یاخین آذربایجان ادبیات و اینجه‌صنعت هوسکارلاری اشتراک ائتمیشدیر. مراسیمده تهراندا یاشایان آذربایجان شاعر و ترجومه‌چیلریندن: حسین شهرک، احمد پوری، اسدالله امرایی، حسن ایلدیریم، رحیم کاویان، ائلدار موغانلی، عدالت دومان، حسن شبدیز، سعید موغانلی، عاقد سارابلی، یانار قاراداغلی، سحر بارانی، آلما موغانلی، اکبر قاداش، ایلهام محمدزاده، ائلتاش صالحی، ائلیاد موسوی و … اؤز اثرلرینی مجلیس اشتراکچیلاری اوچون اوخودولار. تدبیرین سونوندا مجلیس اشتراکچیلاریندان یئددی نفر گنج شاعر: سحر بارانی، آلما موغانلی، ایلهام محمدزاده، اهورا ابوترابی، ائلتاش صالحی، ائلیاد موسوی و یانار قارادغلی‌دان تقدیر اولوندو. شاعرلرین چیخیشی‌ایله برابر«سولدوز»موسیقی گروهو عاشیق سولدوز مهدی‌پورون رهبرلیگیله مختلف عاشیق هاوالاری و شن احوال- روحیه‌لی ماهنی‌لارلا مجلیس اشتراکچیلارینین صمیمی رغبتینی قازاندیلار.
تدبیری تشکیل ائده‌ن اجرا کومیته‌سی بو مجلیسین ایلده دؤرد دفعه تشکیل اولاجاغیندان خبر وئردی. بو اجرا کومیته‌سینین پیلانلاشدیردیغی برنامه چرچیوه‌سینده اوچ مجلیس تهران سویه‌سینده و بیر مجلیس ایسه اؤلکه مقیاسیندا کئچیریلمه‌سی قرارا آلینیبدیر.
یک پاسخ
سلاملار. الیمدن چیخدی بو گؤزل ییغینجاق. ماشینی مشق مدنیت ائوینی نین یاخینلیغیندا ساخلاییب، ییغینجاعا ساری یونلدیکده، جیب تئلفونوم سسلندی و بیر کسگین خبر منه وئریلدی. ائله اونا گؤره قاییتماق مجبوریتینده قالدیم. چوخ حئییف کی بو طنطنه لی ییغینجاغی الدن وئردیم. عزیز دوستوم رضوان ابوترابی دان ایکی دؤنه زنگ ائدیب، منی بو مراسیمه چاغیردیغیندان تشکر ائدیرم. گنج شاعیرلردن تقدیر مراسیمی ده چوخ گؤزل تدبیر ایمیش. هامیسی یاشاسینلار.