الیمیزه چاتان خبره اساسن، چوخ تاسفله آذربایجانین تانینمیش شاعری و ادبی جمعیتیمیزده لاییقینجه سئویلن صمیمی انسان اوستاد فریدون حاصارلی شهریور آیی‌نین اوچونجو گونو تبریز شهرینده حیاتا گؤز یومموشدور.
اوستاد فریدون حاصارلی ۱۳۱۶ینجی ایلده جلفا ماحالی‌نین «یکان کهریز» کندینده آنادان اولموش و گنج چاغلاریندان آذربایجان دیلینده شعر یازماغا باشلامیشدیر.
سئویملی شاعریمیزین جنازه‌سی چرشنبه گونو (۴ شهریور) ساعات ۱۲ ده تبریزین وادی رحمت مزارلیغیندا تورپاغا تاپشیریلاجاقدیر. همن گون آخشام چاغی ساعات ۱۷ دن ۱۹ قده‌ر تبریزین رسالت خیاوانیندا یئرلشن امام حسن مسجیدینده شام غریبان مراسیمی و شهریورین بئشینجی گونو (آدینا آخشامی) اؤلومونون اوچونجو گونو موناسیبتیله لاله خیاوانینداکی امام حسین مسجیدینده خاطیره آخشامی کئچیریله‌جکدیر.
ایشیق– آذربایجان ادبیات و اینجه صنعت سایتی امکداشلاری و ادبی شوراسی آدیندان اوستادین مؤحترم عائیله‌سینه، آذربایجان ادبی جمعیتینه و دوستوموز شاعر رضا حاصارلی(اورمان) جنابلارینا باشینیز ساغ اولسون! دئییب، اوستادین شرفلی خاطیره‌سینی عزیزله‌ییریک.
ایشیق- آذربایجان ادبیات و اینجه صنعت سایتی
۴ شهریور ۱۳۹۴
یک پاسخ
باش ساغلیغی
گئدیملی، گئلیملی دونیا!
اوستاد میرفریدون حصارلی نین آجی اؤلوم خبری اورگیمیزی غربت دیاردا کدرلندیردی. او چوخ سئویملی، تواضعکار و گؤرکملی شاعیردیر. بئله لیکله اولو روحونا رحمت و شفقت دیله ییر و حؤرمتلی حصارلی عایله لرینه، سئونلرینه و آذربایجان خالقینا باش ساغلیغی وئریریک! روحو شاد، مزاری ایشیقلی اولسون!