اوخوماق زامانی: 2 دقیقه

اشتراک گذاری در facebook
اشتراک گذاری در twitter
اشتراک گذاری در whatsapp
اشتراک گذاری در telegram
اشتراک گذاری در email
چئویرن: ایشیق
ترجمه: ایشیق
ایشیق
00:00
00:00

بو یازی‌نین سس فایلی هله حاضیرلانماییبدیر. بو یازی‌نی اؤز سسینیزله اوخویوب بیزه گؤندره بیلرسینیز.

ashrafnuranli
“اشرف نورانلی”‌نین حیکایه‌لر توپلوسو یاییلدی
آئلدار موغانلی

آذربایجان حیکایه یازیچیلیغی‌نین اؤنجول‌لریندن اولان و چوخ تاسفله لاییقینجه تانینمایان احمد صادقی اشرافی(الف. نورانلی)نین حیکایه‌لر توپلوسو ایلک دفعه اولاراق ایشیق اوزو گؤردو. دوققوز حیکایه‌نی احتوا ائده‌ن “قیزیل آتیم و باشقا اؤیکولر” عنوانی‌ایله یاییلان بو حیکایه توپلوسو عمار احمدی عزیز، رجب ابراهیمی، رضا کاظمی و صالح عطایی‌نین بیرگه امکداشلیغی‌لا، اردبیل شهری‌نین “ساوالان ایگیدلری” نشریاتی طرفیندن 1000 نوسخه‌ده یاییلیبدیر. کیتابی اردبیل و ائله‌جه‌ده آذربایجانین باشقا شهرلرینده‌کی اعتبارلی کیتاب ماغازالاریندان و تهراندا ایسه فرزانه و یوسوف‌اوغلو کیتاب ماغازالاریندان الده ائتمک مومکوندور.
noranli “اشرف نورانلی”، “الف. نورانلی” و “فرمان” امضالاری‌ایله انقلابدان سونرا آذربایجان ادبی جمعیتینده و آنا دیلینده نشر اولونان مطبوعاتدا حیکایه یازیچیسی کیمی تانینان احمد صادقی اشرافی 1314 گونش ایلی اردبیلین “باغمئشه” محله‌سینده دونیایا گؤز آچیر و 1364ینجی ایل تهران شهرینده 50 یاشیندا دونیایا گؤز یومور و بهشت زهرا مزارلیغیندا تورپاغا تاپشیریلیر.

احمد صادقی اشرافی‌نین آناسی اردبیلین یاخینلیغینداکی “نوران” کندیندن اولوب، یازیچی‌ایسه آنا سئوگیسینی دیرلندیرمک اوچون بو کندین آدینی (“نورانلی” سؤزونو) اؤزونه تخلص سئچمیشدیر. نورانلی‌نین یارادیجیلیق نمونه‌لریندن هله ایشیق اوزو گؤرمه‌ین نئچه جیلدلیک حیکایه‌لر مجموعه‌سی و “صمد بهرنگی‌ اثرلری‌نین تحلیلی” اثر‌ی‌دیر.

اشرف نورانلی‌نین ادبی فعالیتی‌نین پارلاق دؤرو انقلابدان سونرا باشلاییر. یئنی یارانمیش اجتماعی و سیاسی آتموسفرده فرهاد ابراهیمی، محمود دست‌پیش و اشرف نورانی‌نین بیرگه امکداشلیغی‌لا “ادبی یارپاق‌لار” آدیندا ادبی بیر مجموعه بوراخیلیر. بو مجموعه اوچ نومره‌یه‌دک یاییلیر.

 1358ینجی ایلین اول‌لرینده آذربایجانین ملی شاعری بولود قاراچورلو(سهند) اؤلدوکدن سونرا اوتوز نفردن آرتیق آذربایجان ضیالی، شاعر و یازیچیلارین اشتراکیلا او جومله‌دن: گنجعلی صباحی، سلام‌الله جاوید، حبیب ساهر، محمدعلی فرزانه، هاشم ترلان، عزیز محسنی، علیقلی کاتبی، رضا براهنی، رحیم دقیق، حسین دوزگون، جمال رئوسی، داود شیخاوندی، فرهاد ابراهیمی، اشرف نورانلی، محمود دست‌پیش و … س اشتراکیله، اشرف نورانلی‌نین چالیشدیغی “کوراوغلو”  شرکتینده عمومی اجلاس کئچیریلیر و “تهراندا یاشایان شاعرلر و یازیچیلار جمعیتی”نین تمل داشی قویولور. جمعیتین ایلک اداره هیاتینه گنجعلی صباحی، حسین دوزگون، محمدعلی فرزانه، جمال رئوسی، فرهاد ابراهیمی، داوود شیخاوندی و رحیم دقیق سئچیلیر و گنجعلی صباحی بو جمعیتین فعالیتی دؤرونده اونون صدری و 1360ینجی ایلدن نشره باشلایان جمعیتین اورگانی “گونش” درگیسی‌نین‌ یازیچیلار باشچیسی کیمی فعالیت گؤستریر. “گونش” درگیسی اوچ نومره‌ده یاییلیر و اونون دؤردونجو نومره‌سی‌ایسه پایلانمادان اؤنجه چاپخانادا محو ائدیلیر و قیسا بیر زاماندان سونرا “دمشق” خیاوانیندا یئرلشن “تهراندا یاشایان شاعرلر و یازیچیلار جمعیتی”نین‌ده فعالیتینه سون قویولور.

الده اولان معلوماتا گؤره اشرف نورانلی‌نین ادبی فعالیتی بیر سیرا دوستلاری‌لا برابر بو ایلدن سونرادا داوام تاپیر و دئییلنلره گؤره اوره‌ک اینفاکتی نتیجه‌سینده 1364ینجی ایل ابدی‌لیک اولاراق آذربایجان ادبی جمعیتیله وداعلاشیر.

اشتراک گذاری در print
چاپ

یک پاسخ

  1. بو رحمتلی نین اثرلرینین نشر خبری خوش خبر ایدی . سیزی مین یاشایین

دیدگاهتان را بنویسید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *