“ماهنی‌های عاشقانه” یئنی‌دن نشره بوراخیلیر!
ادبی جمعیتیمیزده اؤز حکایه‌لریله گئنیش اوخوجو کوتله‌سی رغبتینی قازانان تانینمیش بازیچی و ژورنالیست دوکتور مرتضی مجدفرین “ماهنی‌های عاشقانه” آدلی کیتابی یئنی‌دن نشره بوراخیلیر. آذربایجان جمهوریسی شاعرلرینین بیر سیرا شعرلرینی احتوا ائدن بو کیتابا مجدفرین نصرت کسمنلی، بختیار وهابزاده، نبی خزری، ممد آراز و فیکرت قوجا کیمی گؤرکملی آذربایجان شاعرلریندن فارسجایا ائتدیگی ترجمه‌لری داخیلدیر. کیتابین بیرینجی چاپی آذربایجان و فارس دیللرینده ۱۵۰۰ تیراژدا و ۱۱۲ صحیفه‌ده “نشر امرود” طرفیندن بوراخیلیبدیر. کیتابدا هامیدان چوخ نصرت کسمنلی نین شعرلری ( ۱۰ شعر) و باشقا شاعیرلرین هر بیریندن ۳ یا ۵ شعر، ترجمه لری ایله برابر وئریلیبدیر. کیتابا مترجمین طرفیندن یازیلمیش دورد صحیفه لیک بیر مقدمه و هم ده هر بئش شاعیرین ایکی صحیفه لیک ترجمه حالی سالینمیشدیر. مقدمه و ترجمه حاللار فارسجا یازیلمیشدیر. هم ده کیتابین سونوندا مجدفرین ترجمه حالی و یازیب- یاراتدیغی آلتمییشدان آرتیق فارسجا- تورکجه کیتابلارینین سیاهه سی وئریلمیشدیر. بو کیتابین ایلک چاپینی تهراندا کی ۸۸۳۴۵۲۱۷-۰۲۱ نمره‌لی کیتاب یاییمی مرکزینه زنگ ائتدیکده ۲۸۰۰ تومنه الده ائده بیلرسینیز.
