«ادبیات معلمی!!»نین ادبسیزلیگی
«ای فضولی متصل دوران مخالف‌دیر سنه / غالبا ارباب استعدادی دوران ایسته‌مز»
دونیا شؤهرتلی، اوچ‌دیل‌لی گؤرکملی آذربایجان شاعری «ملامحمد فضولی» ملی مئدیانین بیر معلمی طرفیندن تحقیر ائدیلمیشدیر.
اؤزونو «ادبیات معلمی!!» کیمی تقدیم ائدن بو شخص فضولی‌نی دیگر آذربایجان شاعری «صائب تبریزی»له مقایسه‌ده، چوخ تحقیر ائدیجی ایفاده‌لرله «صائب‌ین شعرلری‌نین تورکو واریانتینی دوزلدن فضول بیر شخص» کیمی تانیتدیرمیشدیر. حال بو کی ملامحمد فضولی حدودا ۱۴۸۳نجی(م) ایل دونیایا گؤز آچیب، ۱۵۵۶نجی ایل(۷۳ یاشیندا) حیاتدان آیریلمیشدیر. «صائب تبریزی»ایسه ۱۵۹۲نجی(م) ایل آنادان اولموش و ۱۶۷۶نجی ایل (۸۴ یاشیندا) دونیادان کؤچموشدور. بو او دئمکدیر کی، «صائب تبریزی» «فضولی»نین اؤلوموندن ۳۶ ایل سونرا آنادان اولموشدور. نئجه اولا بیلر ۳۶ ایل اؤلوموندن کئچن «فضولی، «صائب»ین فارسجا شعرلری‌نین تورکجه تقلیدچیسی اولسون؟!
گؤرکملی آذربایجان شاعرینی ملی مئدیا واسیطه‌سیله اؤلکه مقیاسیندا تحقیر ائتمک ایستر تحقیر ائده‌ن شخصین ساوادسیزلیغیندان، ایسترسه اونون ادبسیزلیگیندن ایره‌لی گلمیش اولسادا، ایرنج و پیس بیر داورانیشدیر.
ملی مئدیانین بو موضوع‌ایله علاقه‌دار مسئول‌لاریندان و خصوصیله ده بو اوزدن ایراق «ادبیات معلمی!!»ندن گؤزله‌نیلن ان آز ایش، اونلارین اؤز ایرنج داورانیشلاریندان عذور دیله‌مک‌لری‌دیر.
«ایشیق» – آذربایجان ادبیات و اینجه صنعت سایتی
۰۵/۰۲/۱۴۰۰
یک پاسخ
اینسان ساده جه یئمکدن ،ایشمکدن،اَیین باشدان یوخسول قالماز کی ائله ساوادسیزلیق اؤزو یوخسولوغون بؤیوک باباسیدی!!!
(الله آدامین عاغلین آلانا قده ر جانین آلسین…!)