«دونيا آنا ديلي گونو» موبارک!
«ایشیق» – آذربایجان ادبیات و اینجه صنعت سایتی
21 فئورال(2 اسفند) بيرلشميش ملت‌لر تشکيلاتي‌نين تحصيل، علم و مدنيت تشکيلاتي (یونسکو) طرفیندن «دونيا آنا ديلي گونو» اعلان ائدیلیبدیر. یونسکونون دئدیگینه گؤره دونيا اهاليسي‌نين دانيشديغي 6000 ديلین ياريسي محو ائدیلمکده‌دیر و هر هانسي بير ديلين محو ائديلمه‌سي ايله ده بشر مدنيتي خزينه‌سي‌نين بير حصه‌سي محو اولور.
ديلچيليک بيليک‌لري اساسیندا، بير ديل محصولدار، انضباطي، علمي و مدني فعاليتين بوتون ساحه‌لرينده اشتراک ائتميرسه، ملی و ملت‌لر آراسی سويه‌ده تئخنولوژي، اينفورماسیا و بشرین ديگر فعاليت‌لرینه اويغونلاشميرسا، اوزون مدتلی داوام گتیره بیلمه‌ییب و محو اولاجاقدیر؛ عکسینه، داییما ياشايان و ديناميک اولان ديل‌لر ایسه گونوگوندن باجاريق سويه‌لريني داهادا يوکسلدیر و مين‌لرله يئني سؤز و مفهوملارلا زنگينلشه‌جکدیر.
ائتنیک مختلفلیگی یاشایان و چوخ ملت‌لی اؤلکه‌لرده غیررسمی ديل‌لرین اوغورسوز بير طالع یاشاماسی و محو اولما تهلوکه‌سي همیشه جدی بیر پروبلئم کیمی گوندمده‌دیر. بو خالق‌لارین آنا دیلینده تحصیلدن محروم اولماسی اونلارین فردي و سوسيال حقوقلاری‌نین تاپدالانماسی و اجتماعي حياتلاریندان لاییقینجه بهره‌لنه بیلمه‌دیک‌لری دئمکدیر. بونون اوچون ده «آنا دیلی» و «آنا دیلینده تحصیل» مسئله‌سی خالق‌لارين اؤز مقدراتيني تعیین ائتمه حقوقو اوغروندا آپاردیغی مبارزه‌نین آیریلماز بیر حصه‌سی‌دیر.
ایراندا ان آزی يوز ايله یاخیندیر کي، آيري-سئچگيليک و مرکزلشمه سیاستی نتیجه‌سینده واحد ایران چرچیوه‌سینده یاشایان غيرفارس خالق‌لارين دیل‌لرینه رسمی تحصیل دیلی کیمی شرایط یارانماییب و اونلارا اعتناسیزلیق و حؤرمتسيزليک‌له یاناشیلیبدیر. حال بو کی، ایراندا یاشایان خالق‌لارین دیل و مدنیت ثروتی عموم ايران مدنيتيني زنگينلشديرن و انکشافلاندیران بیر عامل کیمی ده دیرلندیریله بیلردی. نییه کی، ديل يالنيز اونسيت واسيطه‌سي یوخ، هم ده اينسانين دوشونجه و حس ائتمه واسيطه‌سيدير؛ بو سببدن آناديل‌لرينه بیر تحصیل دیلی کیمی رسمیت باغیشلاماق و اونلارین انکشافینا شرایط یاراتماق، فرقلي اينسان قروپلاري‌نين دويغولاريني و دوشونجه‌لريني انکشاف ائتمک، مدنيت‌لر آراسيندا دانیشما و آنلاشمایا مساعد شرایط و امکان یاراتماق و عموم مدنی ارثی زنگینلشدیرمک‌دیر.
«آنا دیلی» و «آنا دیلینده تحصیل» مسئله‌سی بو گون اؤلکه‌نين اجتماعی و سياسي پروبلئملريندن بيرينه چئوريلميشدير. واحد ایران چرچیوه‌سینده یاشایان خالق‌لارین او جومله‌دن آذربایجان خالقی‌نین ديل برابرليگي وطنداشلارين قانون قارشيسيندا برابر حقوقلوغونون اساس خصوصيت‌لريندن بيري‌دير. ایران اسلام جمهوریسی‌نین اساسی قانونوندا (15-نجي ماده‌ده) مختلف ديل‌لرين مطبوعات و عمومی اینفورماسیا واسیطه‌لرینده استفاده اولونماسی و فارس دیلیندن علاوه اولاراق اونلارین ادبیاتی‌نین مکتب‌لرده تدريس اولونماسی قبول اولونوبدور. بو پرينسيپ اونون معین چاتيشمازليق‌لارينا رغمن، تاسفله هله ده حياتا کئچمه‌ییبدیر.
«ایشیق» – آذربایجان ادبیات و اینجه صنعت سایتی- بیر مئدیا واسیطه‌سی اولاراق، «دونيا آنا ديلي گونو»نو عزیزله‌ییر و اؤلکه‌ميزده‌کي موجود ديل‌لر آراسیندا اولان آذربایجان دیلی‌نین(آذربایجان تورکجه‌سی‌نین) بیر تحصیل دیلی کیمی رسمیلشمه‌سینی آذربایجان خالقی‌نین اجتماعی و مدنی حقی بیلیر. بو اوزدن اونون تبلیغینده چالیشیر و بو چالیشمانی اؤلکه‌نین اجتماعی و مدنی انکشافينا یاردیمجی عامل کیمی حساب ائدیر.
«ایشیق» – آذربایجان ادبیات و اینجه صنعت سایتی
2 اسفند 1399
2 پاسخ
در این وانفسای زندگی، تلاشتون ستودنی و ارج نهادنی است. هر آنچه که وسعت دید را و فکر را و عمل را گسترش دهد و فضاداری آورد، نیکوست و هم آن دوای درد بشر امروز است. پایدار باشید و به قول خودمون؛ قلموز الوزدن دوشمه سین.
گؤزلریمدن آخان داملالار
سوزوب یاناغیمی یالار
دیلیم کوسوب ،
بوغازیما قاچار
یوخسان!
بو هارای هارایا چاتار
کیم بو دیلی دیله توتار
کیم باریشدیرار
#شئعیر
#فریبا_مرتضایی
#آنا_دیلی
دونیا آنا دیلی قوتلو اولسون
Happy International Mother Language Day!
حؤرمتلی اوستادیم ائلدار موغانلی جنابلارینا و ایشیق سایتیندا چالیشان توم عزیزلریمه درین سایغیلار و منت دارلیغیمی بیلدیریرم☘