«جاوید مورتوز اوغلو» کرونا ویروس سببیندن حیاتینی ایتیردی
یاییلان خبرلر اساسیندا، تاسفله تورکیه ده یاشایان تانینمیش آذربایجانلی خواننده «جاوید مورتوز اوغلو» کرونا ویروس خسته‌لیگی سببیندن مرداد آیی‌نین اون‌آلتینجی گونو 59 یاشیندا حیاتینی ایتیرمیشدیر.
1341نجی ایل تبریزین «چرنداب» محله‌سینده آنادان اولان «جاوید»، عایله‌نین مدنیتینه اویغون ائرکن یاشلاریندان فلسفی فیکیرلرله (اهل حق) مشغول اولموش و هوسکار بیر شکیلده موسیقی ایله ده ماراقلانماغا باشلامیشدیر. موسیقی صنعتینی ایران آذربایجانیندا تانینمیش موسیقی اوستادلاری علی سلیمی، شاطریان، علی فرشباف و حسن دمیرچی کیمی صنعتکارلاردان آلمیش و بیر نئچه غیررسمی آلبوم اوزه‌رینده چالیشمیشدیر. 1372نجی ایل تحصیلینه داوام وئرمک اوچون آذربایجانا گئتمیش و باکی کونسئرواتوریاسیندا موسیقی تحصیلینی تکمیللشدیرمیش، موغام صنعتینه دایانان «جاز – موغام» سبکی‌نین بسته‌کارلاریندان اولموشدور. ایرانا قاییتمیش و «سنلی گونلر» و «سوسمام» آدلی ایکی موسیقی آلبومو بوراخمیشدیر. 1382نجی ایل تهراندا «یوز بیر نفس» آدلی شعر مجموعه‌سینی «اندیشه نو» نشریاتی طرفیندن یایمیشدیر.
«جاوید مورتوز اوغلو» بیر نئچه ایل ایراندا قالدیقدان سونرا تورکیه‌یه کؤچموش و عؤمرونون سونونا قده‌ر استانبول شهرینده یاشامیشدیر. او تورکیه‌ده یاشارکن «اهل حق» و «علوی‌لیک» حال- هواسیندا اولان ماهنی‌لاری ایله شهرت قازانمیش، فلسفی فیکیرلرینی تبلیغ ائتمک اوچون تورکیه، استرالیا، آذربایجان و آلمان اؤلکه‌لرینده مختلف سمینارلار کئچیرمیش و دانیشیق‌لار آپارمیشدیر. استانبول شهرینده 20 ایل‌لیک موسیقی تحصیلی تجروبه‌سینی اؤز مئتودو ایله واکال صنعتیتی‌نین اؤیره‌دیلمه‌سینه حصر ائتمیش و فلسفه، موسیقی و شعر موضوعلاریندا بیر نئچه کیتاب یازمیش و نشر ائتدیرمیشدیر.
«ایشیق» – آذربایجان ادبیات و اینجه صنعت سایتی امکداشلاری، «جاوید مورتوز اوغلو»نون ایتگیسینی صنعتکارین حؤرمتلی عائله‌سینه، دوست – تانیشلارینا و آذربایجان صنعت عالمینه تسلیت دئییر و صنعتکاریمیزین خاطره‌سینی عزیزله‌ییر.
«ایشیق» – آذربایجان ادبیات و اینجه صنعت سایتی
17/05/1399
خبرین قایناغی: https://www.gazeteduvar.com.tr/
یک پاسخ
هی دنیا نجه غریبسن انجاخ یاخچیلاری الیرسان