باش ساغلیغی
دونیا سندن کیملر کئچدی
مجید ابراهیم زاده ( اژدر عمی ) 1399-1317
ازلدن بئله دیر چونکی کاینات
جهان دائمیدیر عومور امانات
الدن اله کئچیر وفاسیز حیات
بیز گلدی _گئدریک، سن یاشا دونیا
ساز و موغام صنعتینین تانمیش صنعتکاری” اوستادمجید ابراهیم زاده” (اژدر عمی) آغیر خسته لیکدن سونرا، بوگون 99/1/24 تبریز شهرینده حیاتا گوز یومدو.
اژدر عمی 1317-نجی ایلده زنوز ماحالی‌نین هوروز کندینده دونیایا گوز آچدی. عمیسی عاشیق ولی‌نین صنعتینه لاپ خیردا یاشلاریندن ماراق گؤستردی. اون‌ایکی یاشیندا ایشله‌مک اوچون تهرانا مهاجرت ائتمگه محبوراولدو و نئچه ایلدن سونرا تبریز شهرینده ساکین اولدو. ساز هوسی، گوزل سسی، اونو عاشیق عیسی‌نین مکتبینه چکدی. بوتون هاوالاری سازصنعتی‌نین قایدالارین عاشیق عیسی‌دان اؤیرندی. عینی زاماندا اوستاد شاطریان، اوستاد حسن دمیرچی، حسن ایرانی ایله برابر موغامات مکتبی‌نین آذربایجاندا دیرلی معللیم‌لریندن اولوبدی.
۴۰-نجی ایللرده صمد بهرنگی‌نین قوردوغو ضیالی‌لارین محفلی‌له تانیش الدو. او ایللر اژدر عمی‌نین ائوی‌نین اوستونده‌کی بالاخانا، صمدین دوسلاری‌نین گئجه‌لر ییغینجاق یئری و گؤزل بیر موسیقی اوجاغی اولموشدور.
بوگون بیر عؤمور سازی، سؤزو، صلحی، وطنپرولیگی قورویان اینسان، آغیر خسته‌لیک گونلریندن سونرا، حیاتا گؤز یوموب، بیزدن آیریلدی؛ ائلمیزین «اژدر عمی»سی گئتدی!!! ساز سوسدو، ائل آغلادی!
«ادبیات سئونلر گروهو» بو آجی آیریلیغی اوستادین عائیله‌سینه، سئونلرینه خصوصیله ده حراستی، بهمنی … و موسیقی عائیله‌سینه باش ساغلیغی وئریر.
ادبیات سئونلر گروهو
99/1/24
