آذربایجان شاعری «میرحسینقلی ریاحی‌فر(سیّد)» حیاتدان آیریلدی
چوخ تاسفله آذربایجان شاعری میرحسینقلی ریاحی‌فر(سیّد) دی آیی‌نین آلتینجی گونو حیاتا گؤز یومموش و ۶۳ یاشیندایکن ادبیات عالمینی ابدی‌لیک ترک ائتمیشدیر.
میرحسینقلی ریاحی‌فر(سیّد) ۱۳۳۳ نجو ایل «مرند»ین یکانات بؤلگه‌سینین «کهریز یئکن»کندینده آنادان اولموش، ابتدایی تحصیلاتینی دوغما یوردوندا، اورتا مکتبی ریاضی رشته‌سینده خوی شهرینده و عالی تحصیلاتینی‌ایسه جغرافیا رشته‌سینده تبریز دانیشگاهیندا باشا وورموشدور. ۱۳۵۴نجی ایلدن معلم اولموش و اوتوز ایل تدریسدن سونرا ۱۳۸۴نجی ایلده تقاعده چیخمیشدیر. آنجاق تدریس ایشینی ۱۳۹۱نجی ایله‌دک تبریزین غیردولتی مدرسه‌لرینده داواملاندیرمیشدیر. او حیاتی‌نین سون ایللرینی تبریزده یاشامیشدیر.
مرحوم شاعریمیز آذربایجاندا اجتماعی شعرلر یازانلار سیراسیندا اؤزونه مخصوص مؤوقعی و ادبی جمعیتیمیزده حؤرمت گؤرن شاعرلریمیزدن اولموشدور. ایندییه‌دک «دومانلی ایللر» آدلی شعر مجموعه‌سی(۱۳۸۵)، «آذربایجان تورکجه‌سینده شعر قالب‌لری» کیتابی(۱۳۹۴) و «یادی از دیار یکانات» آدلی تدقیقی اثری (۱۳۹۶) ایشیق اوزو گؤرموشدور.
«ایشیق» – آذربایجان ادبیات و اینجه صنعت سایتی امکداشلاری آدیندان مرحوم شاعریمیزین ایتگیسی موناسیبتیله حؤرمتلی عائیله‌سینه، یاخینلارینا، آذربایجان ادبی حمعیتینه و سئونلرینه باش ساغلیغی وئریب، اونودولماز خاطیره‌سینی عزیزله‌ییریک.
«ایشیق» – آذربایجان ادبیات و اینجه صنعت سایتی
۰۶/۱۰/۱۳۹۶
یک پاسخ
معلم وشاعر بزرگی بود ….خدایش رحمت کند .به بازماندگانش تسلیت عرض می نمایم .