کیتاب رفیمیزده / هانیه تبریزلی (آیمان)
(احد فرهمندی‌دن اوچ کیتاب)
۱۳۹۵جی ایلین ایلک یاریسیندا، چالیشقان یازار، فولکلورچو و چئویرمن «احد فرهمندی»دن اوچ اثر آنا دیلیمیزین ادبیات خزینه‌سینه قازاندیریلدی.
۱- «سئل گلردی. آشورا داشاردی. سو فَوواره کیمی آیاق‌یوللاریندان فیشقیراردی. حیطی دوْلدوراردی. قویونو دوْلدوراردی. چوروموش آغاجلاری، سامانلاری، شهرین یوُخاریسیندا اوْتورانلارین لیژلنمیش گوللرینی اللرینین اوستونه آلیب، اوْتاقدا بیزه سوُناردی، یالنیز سلام وئرمگه دیلی اولمازدی.
کیلیمی ییغیشدیراردیق. شالوارلاریمیزی چیرمالاردیق. شالواریمیزین آراسی ایسلانیب، شالاپ‌ـ شوُلوب سس وئرردی. چادراسینی بئلینه باغلایان آنامیز آغ آیاقلاریلا سوُیون ایچینده تیرـ تیر اسیب، تئزـ تئز صلوات چئویررک، دئیردی:..»
یوخاریدا کی متن، دیرلی فارس یازاری «علی‌اشرف درویشیان»ین «آبشوران» آدلی اوزون حکایه اثریندندیرکی، احد فرهمندی «آشورا» آدی ایله گؤزل و آخیجی اولاراق آنا دیلیمیزه ترجمه ائدیب، تبریزده آذرتورک یایین ائوی طرف ۱۳۹۵-جی ایلین اردیبهشت آییندا ساتیشا بوراخیلیب.
۱۲۰ صفحه ده اولان همین کتابی تبریزده اختر، انور و نباتی یایین ائولریندن ۵۵۰۰ تومنه آلماق اولار.
۲ـ ۱۳۲۵_جی ایلین قانلی قادالی ایللریندن سونرا اردبیل ده باش وئرن اولایلارا سؤیکنن «سمفونی مردگان» تانینمیش یازار «عباس معروفی» جنابلاری قلمی ایله فارس دیلینده یازیلسا دا، سککیز آی دورمادان وقت صرف اولونان بو اثری «احد فرهمندی» آخیجی بیر نثر ایله «اؤلولر سمفونییاسی» آدیندا آنا دیلیمیزه چئویریب، بئله‌لیکله ترجمه ادبیاتیمیزا یئنی بیر اثر آرتیریبلار. آدی گئدن اثری «سئوینیزم یاشاییرام» شعر توپلوسونون دیرلی شاعیری نادر پاشائی (پاشا) جنابلاری چوخ دقتله ویراستاریق ائدیب، هابئله حؤرمتلی یازیچی حسن بابایی (عجشیرلی)جنابلاری بو ترجمه اوچون سامبالی بیر گیریش یازیبلار، گیریشین بیر بؤلومونده اوخویوروق:
«… یئنی‌دن ناغیل یازماق قصدیمیز اولمادان ایسته‌دیم آرتیرام بو ناغیل تام ۱۳۲۵-جی گونش ایلیندن بویانادک یازیلان بیر عائله‌نین حیات دورومودور. اونونلادا اورادا حاکیم اولان قوّه‌لر «جابر»ی چوخ گوده فیکیر، زوْر دئین «ائله آدی سایاغی» بارا گتیریب. خورده بورژووانین اساسلارینی نظره آلیب «چوخ بختیار» اولماق ایسته‌ییر. مثال اولاراق اوشاقلارینی اوخوماقدان اوزاقلادیب، «اوخوماق ندیر، دنه سات!» دئین جابر بوندان باشقا نئجه فیکیرلشه بیلر؟»
بو کتاب ایسه تبریزده چالیشقان «آذرتورک» یایین ائوی طرف ۱۳۹۵-جی ایلین تیر آییندا ساتیشا بوراخیلیب. ۳۶۰ صفحه‌لیک بو اثری تبریزده اختر، انور و نباتی یایین ائولریندن ۱۸۰۰۰تومنه آلماق اولار.
۳ـ علی و نینو ـ ایلک دفعه ۱۳۱۵-جی ایلده ویانادا آلمان دیلینده E.P.Tal وئرلاق طرفین‌دن نشر ائدیلن و ایندیدک دونیانین ۳۳ دیلینه ترجمه ائدیلن تاریخی و سئوگی رومانی‌دیر.
اثرده علی‌نین نینویا محبتی و علی خان شیروانشیرین داغیستان، قاراباغ، گرجستان و ایرانا سیاحتلریندن صحبت آچیلیر. مکتبی بیتیردیکدن سونرا علی و نینو ائوله‌نمک قرارینا گلیرلر. علی‌نین آتاسی قادینلارا، خصوصاً باشقا دینه مخصوص قادینا قارشی محافظه‌کار فیکیرلرینه باخمایاراق نگاهی دستکله‌ییر. نینونون آتاسی ایسه اوّلجه ترددود ائدیر، لاکین ارمنی اصیل‌لی دوستونون مسئله‌یه مداخله‌سی ایله سوندا مؤوقعینی یومشالدیر.
حادثه‌لر همین ارمنی‌نین نینویا وورولماسی و حیله‌گرلیکله اونو قاچیرماسیندان سونرا دراماتیک کاراکتر آلیر. علی دینی‌نین قایدالارینا اویغون اولاراق خاین ارمنینی اؤلدورور، لاکین نینویا ال قالدیرماغا جرأت ائتمیر. علی ارمنی‌نین یاخین قوهوملارینین گؤزله‌نیلن انتقامیندان یاخا قورتارماق اوچون باکینی ترک ائتمه‌لی اولوب ایرانا گلیر مدتلر نینو ایله درباردا یاشاییر…
اثرین ایلک نشرینده مؤلف کیمی قربان سعید گؤستریلمیشدیر. آذربایجان یازیچیلار بیرلیگی ایسه ۱۳۷۱-جو ایلده قبول ائتدیگی قراردا اثرین مؤلفی‌نین یوسف وزیر چمن‌زمنیلی اولدوغونو تصدیق ائتدی. ایران تاریخینده بوللو ایزلری تورک سویلو شیروانشاهلارین تاریخینین بیر بؤلومونو هابئله ایرانین اجتماعی و مذهبی تاریخینین قیسا بیر بخشلرینی بو کتابدا یئرلی یاتاقلی اوخوماق اولار.
بو اثری ده «دلی کور»، «قاچاق نبی» و … کتابلاری کؤچورن «احد فرهمندی» جنابلاری بو تای آذربایجان اوخوجولاری اوچون کؤچوروب، تبریزده تورک کتابلاری اوزرینده چالیشان «آذرتورک» یایین ائوی طرف ۱۳۹۵-جی ایلین تیر آییندا ساتیشا بوراخیلیب. ۲۸۰صفحه‌ده اولان بوکتابی تبریزده اختر، انور و نباتی یایین ائولریندن۱۵۰۰۰تومنه آلماق اولار.
