اولدوز
رامين جهانگيرزاده
سپيلميشم توخوم تك
من گئجه تارلاسيندا
بيتميشم چيچك كيمي
قارانليق هاواسيندا
ساچيم ايشيق تك پارلاق
پارلانميشام گوموش تك
اوچورام گؤيلرده من
قانادلانيب آغ قوش تك
هر كيم منه اوخشاسا
ايشيقلانار گؤيلرده
منيم كيمي ياشاسا
نغمه اولار ديللرده
هر كيم منه خوش باخسا
قارانليقدا ساچيلار
ايشيقلي بير گول كيمي
چيچك آچار آچيلار
هركيم منه خور باخسا
قارانليقدا بوغولار
اوره يينده بايقوشلار
يووا سالار دوغولار