بوگون سه شنبه 31 فروردین 1400 ساعات 10:33
ایشیق 1
آذربایجان معلم‌لری و تحصیل مساله‌سی
ایشیق 2

آذربایجان قفه‌خانالاری

ایشیق 3

آذربایجان و مهاجرت مساله‌سی

ایشیق 4
آذربایجان توی‌لاری

قـيش‌دان سونرا بيزيم كندده/ سياوش كسرایی- نرجمه: داود اهري

بير گون، گون‌باتان چاغـي، نوروز عمي ايش‌دن قايـيديردي کي، كندين اوشاق‌لاري اونو دؤوره‌له‌ييب، دئديلر:

– نوروز عمي، بيزه بير ناغـيل سؤيله.

نوروز عمي كي، اوشاق‌لارين سؤزونو يـئره سالماغي سئومزدي بير آغاج كؤتويونون اوستونده اوتوروب، دينجيني آلا- آلا دئدي:

– ياديما گلير چوخ ايل‌لر بوندان قاباق، او زامان كي، سيزين آتا و آنالارينـيز اوشاق ايديلر ياداکي دونيايا گلمه‌ميشديلر- بير ايل بير غريبه ايش اوز وئردي:

كنديميزين قـيشي قورتاردي، آمما هر نه قده‌ر گؤزله‌ديك، ياز گلمه‌دي.

قـيزيل گول داريخـيردي، آمما قؤنچه‌سيندن چـيخا بيلميردي تا اؤز گؤزه‌ل پالتارينـي هامي‌يا گؤستره.

بولاق دره‌لره تؤكولوب اوخويا بيلمه‌ييردي.

داغلار ايسته‌ييرديلر قارلـي بؤرك‌لرين گؤتورسونلر، آمما ائله‌يه بيلمه‌ييرديلر.

اينك‌لر بيزوولاري ايله، قويون‌لار قوزولاري ايله، و كئچي‌لر چپيش‌لري ايله دار- قارانلـيق تؤيله‌لرده يونجالارين گويرمه‎سيني و ياشيل چمن‌ليك‌لرده گزمه‌يي گؤزله‌ييرديلر. كند اهالي‌سي پنجره‌لردن گؤيه باخـيرديلار، آمما ياز موشتولوقچوسو گتيرن قارانقوش‌دان بير خبر يوخ ايدي. هامي‌دان آرتـيق ناراحات چوبان اومودعلي ايدي.

اومود علي كند اهالي‌سيندن داها آرتـيق يازين يولونو گؤزله‌ييردي. آرزولايـيردي كي، سوروسونو داغـين ياشيل اتك‌لرينه يايا و توته‎يـي‎نين موسيقي‌سي ايله قـيرميزي لاله‌لري داش‌لارين كناريندا بيتيره:

آخـيردا بير گون اومودعلي قـيش‌دان بـئزدي. يـئريندن قالخـيب، پالتارلارينـي گئـييندي، تاخچادان گولاب شوشه‌سيني گؤتوردو و داغا ساري اوز قويدو…

گئـتدي، گئـتدي و گئـتدي… يـئـتيشدي داغـين دالـيـنا، او يـئره كي، يـئل لرين يوواسي ايدي. گولاب شوشه‌سيني ترپتدي، گولابي سپه‌له‌دي هاوايا و يـئل‌لره دئدي:

– گئدين داغا، چؤله باخـين گؤرون، بلكه يازين موشتولوغونو گتيرن قارانقوشو گؤره بيلدينيز. اونا دئـيين چوخ گئجيكيب.

يـئل‌لر كي، گولابين قوخوسوندان جانلانميشديلار، سئوينجك يولا دوشدولر. بولودلاري گؤيون اوزودن كنارا چكيب، گئـتديلر، گئـتديلر و بير مدت اونلاردان بير خبر اولمادي.

يـئنه هر بير شئـي ترپنيش‌سيز قالدي‎لار. داغ‌لارين، آغاج‌لارين و آدام‌لارين قولاق‌لاري سس‌ده ايدي.

بير گون سحر آلا توراندا، اومودعلي‌نين پنجره‌سي آچـيلدي. اومود علي يـئريندن سيچرادي، گؤردو سحر يـئلي يورغون و نفس تؤوشويه- تؤوشويه گليب كي:

– نه اوتوروب‌سوز، يازين خبريني گتيرن قارانقوش يولدا قالـيبدي.

– نه اولوبدور؟

– بير نادينج اوشاق اوخونان ووروب اونون قانادينـي يارالايـيب‌دير.

اومود علي دوردو، چانتاسينـي گؤتوروب. گئـتدي كند اهالي‌سي‌نين يانـينا و دئدي:

– گئده‌ك، گئـتمه‌سك نه قارانقوش گلر، نه ده ياز.

اومود علي قاباق‌دا و يولداش‌لاري اونون دالـيسيجا يولا دوشدولر.

آز گئـتديلر، چوخ گئـتديلر… يـئـتيشديلر، سحر يـئلي دئـين يـئره گؤردولر قارانقوش بير داشين اوستونده ياري جان، يورغون- آرغـين دوشوب و سويوق‌دان دونماق حالـيـندادير. اومود علي قارانقوشو گؤتوردو، يارالارينـي چپيش‌لرين يارالارينـي باغلايان كيمي، اونون يارالانميش قانادينـي باغلادي.

سونرا بويون شالـينـي قارانقوشا ساريدي و اونو قـيزديردي.

گئجه‌دن سحره‌دك اومودعلي ايله دوست‌لاري اودون كناريندا نؤوبه ايله قارانقوش‌دان ميغايات اولدولار. صاباح صوبح قارانقوشون ياراسي بيتيشدي و توختادي. قارانقوش قانادلارينـي آچدي و اوچدو:

بير- ايكي دؤنه اونلارين باشي‌نـين اوستونده فيرلاندي.

آدام‎لار قـيشقـيرا- قـيشقـيرا دئـييرديلر:

– قارانقوش! داها گئـت يازي كنديميزه آپار.

قارانقوش كنده ساري اوچدو. اومود علي ايله يولداش‌‌لاري كنده چاتاندا، قـيش‌دان داها بير اثر يوخ ايدي. هامي سئوينيردي و هريان بهشت كيمي يام ياشيل ايدي. بولاق ماهنـي اوخويوردو. قـيزيل گول كؤينه‌يي‌ني گؤستريردي. آغاج‌لار اوينايـيرديلار. آياق توتان قوزولار ياشيل دره‌لرده چمن‌لرده اوتلايـيرديلار.

كند اهالي‌سي قول‌لارينـي چـيرمالايـيب ايشله‌ييرديلر.

هامي چالـيشيردي. ياز ايدي و ايش فصلي ايدي.

اومود علي اؤز- اؤزونه دئدي:

– ياز گلدي، ايندي داها واختـي‌دي.

سورونو قاباغـينا قاتـيب و يوللاندي. بئل باغـيندان توته‎ييني چـيخاريب باشلادي ياز نغمه‌سيني چالماغا.

هر بير داشين كناريندان بير لاله، ياواش- ياواش باش قاوزايـيردي. ائله بيل چمن‌لر چـيراغان اولموشدو و هر لاله بير چـيراق ايدي.

گون‌باتان چاغـئـيدي كي، او بيري قارانقوش‌لار دا يولدان يـئـتيشديلر. جوت- جوت كندين ائولرينه ساري گئـتديلر تا اؤزلرينه بير يووا قورسونلار.

منيم اوشاق‌لاريم! اومودوم وار قارانقوشون قانادينـي سينديران او نادينج اوشاغـين آدينـي مندن سوروشماياسيز. نه ائله‌ييم من ده قوجالميشام، ياديمدان چـيخـيب!

نوروز عمي‌نين ناغـيلـي باشا چاتدي.

اوشاق‌لار سئوينجك بير به بير نوروز عمي‌دن ويدالاشيب و مسافر قارانقوش‌لار كيمي كندين ائولرينه گئـتديلر.

دیدگاهتان را بنویسید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *