آراز اولان صمد
رقیه علی‌قُلیان (لاله)
بالاجا قارابالیغین اؤلوم گونونو خاطیرلایارکن
آت‌لاری چاپا- چاپا
چاتاجاییق آرازا.
ظولمات گئجه‌دن قاچیب،
قارتال تک گؤیه اوچوب،
تزه قانادلار آچیب،
چاتاجاییق آرازا.
قارا قیش‌دان باج آلیب،
زیروه‌لردن اوجالیب،
بابک‌لردن گوج آلیب،
چاتاجاییق آرازا.
کؤکس‌لر چوخوروندا
قارا بالیق اوزه‌جک؛
اولدوزون شن نغمه‌سین
دوداقلارا دوزه‌جک؛
صمدی هارایلاییب
چاتاجاییق آرازا.
آراز اولان صمدین
دالغاسی قوزاناجاق؛
حایاتین تارلاسینا
سئوگی‌لر جالاناجاق؛
صمد عمی سسله‌ییب
چاتاجاییق آرازا.
صمد، یازار قلمین
ائل‌لره پایلایاجاق؛
آرازدان قالخان بولود
یئنه دَنه دولاجاق؛
اوشاقلار اوندان یئییب
یئنی صمد اولاجاق؛
انیش یوخوشلار آشیب
چاتاجاییق آرازا
93/۶/۹
